Super Bowlimi pissartanngortut Kansas Citymi nalliussineranni aallaasersortoqarnerani inuk ataaseq toqutaasoq

Amerikamiut arsariaasiannik arsaattartuni ukioq manna pissartanngortut, Kansas City Chiefs, nersorniarlugit Kansas Citymi pingasunngornermi ingerlaaqatigiittoqarmat aallaasersortoqarpoq inullu ataaseq tassani toqutaalluni.

Kansas Citymi politiit pisortaat Stacey Graves taama ilisimatitsivoq. Aallasersornermi ikilerneqartut qulit 15-illu akornanniittut siullermik oqaatigineqarpoq, kingornali tamanna 21-nngortinneqarluni.

- Arfineq-pingasut inuunerat navianartorsiortut, allallu arfineq-marluk ajoqusingaatsiarsimasut, arfinillillu annerusumik ajoquserneqarsimanngitsut paasivarput, Kansas Citymi qatserisartut ittuat oqarpoq.

Qimuttuitsut Kansas Citymi unittarfiata Union Stationip nalaani aallaasersortoqarpoq. Kansas City Chiefsikkut San Francisco 49ersikkunnut ajugaanerat nalliussineqarnerani aallaasersortoqarpoq.

Aallaasilisartut marluk tigusarineqartut aallaqqaammut nalunaarutigineqarpoq, tigusarineqartulli pingasunngortut kingorna nalunaarutigineqarluni.

Politiit pisortaata oqarnera naapertorlugu sooq aallaasersortoqarnersoq politiit misissuiffigileruttorpaat.