Sungiusaasoq kannguttaatsuliorsimasutut pasineqarnermi kingorna soraarsinneqartoq
- Ukiukitsunik atornerluinerit sakkortuumik akerleralugillu akuerinngilagut
Badminton Kalaallit Nunaat tallimanngornermi ualikkut taama allaaserisaqarpoq.
Peqatigiiffiup kannguttaatsuliornermik pasilliuteqartoqarnera pillugu suliaq ilisimalereeraalu sungiusaasuusimasoq soraarsinneqarpoq. Pineqartoq sungiusarnernut akuutinneqarunnaarlunilu siulersuisuuffimminit atuuffeerutsinneqarpoq.
- Kattuffimmi taamatut nalaataqarnikuunerput annikilliuutigaarput. Kattuffimmiit Kalaallit Nunaanni Politiit suliamut tunngatillugu pisinnaasarput malillugu ikiorniarsarivagut.
KNR-mut allakkatigut akissuteqarnikkut Kalaallit Nunaanni politiit ilisimatitsipput nalunaarutiginnittoqarneranik tigusaqarsimallutik paasiniaanermullu atatillugu inuk ataaseq Eqqartuussisoqarfik Sermersuumi septemberip 30-ani sassartitsinneqarnermi kingorna tigummigallarneqartoq.
- Eqqartuussisoqarfik Sermersuumi matut matoqqatillugit sassartitsisoqarpoq. Misissueqqissaartoqarneranullu atatillugu annerusumik oqaaseqarsinnaanngilagut, politiit allapput.
Tatiginnissinnaaleqqinnissaq anguniarneqartoq
Suliamut atatillugu paasissutissaateqartoqaruni imaluunniit tapersersorneqarnissaq pisariaqartinneqarpat politiit kommuniluunniit attavigineqarnissaat peqatigiiffiup kaammattuutigaa.
- Kattuffimmiit Timersoqatigiiffiit Kattuffiat peqatigiiffillu suleqatigiilluta suliniutigissavarput siunissami aggersumi timersornermut tatiginnissinnaaleqqinnissaq sunngiffimmi nammineq kajumissusertik atorlugu annertuumik suliaqartut toqqissisimanartumik ingerlariaqqinnissaat anguniarlugu.
- Nalaataqarsimasunut misiginneqataalluta neriuppugut suliaq naammassilluarumaartoq.