Sunak partiip siulittaasuatut ministeriunertullu tunuartoq

Rishi Sunak qinersinermi Labourimut ajorsangaatsiarnermi kingorna Det Konservative Partiimi siulittaasutut ministeriunertullu tunuarpoq.

Taassuma tamanna Londonimi Downing Street 10-imit oqalugiarnermini oqaatigaa.

- Ajuusaarpunga. Sapinngisara tamaat matumani suliaqarpunga, kisianni Tuluit Nunaanni naalakkersuisut nutaat kissaatigigisi ersarissumik takutipparsi. Aalajangiinersi kisimi isumaqarpoq.

- Kamaatigisarsi pakatsinisilu tusaavakka, qinersinermilu ajorsarnitsinni akisussaaffimmik tigusivunga.

- Qinersinerup inernerisa kingunerisaanik partiip siulittaasutut tunuarpunga. Erngertumiunngitsoq, kisianni paarlaasussamik aalajangiisoqareerpat, taanna oqarpoq.

Naak qinersiviit tamarmik suli kisinneqanngikkaluartut Det Konservative Partiip partiip oqaluttuarisaanerani aatsaat taama qinigaanngitsigisoq ersarippoq.

Sulisartut partiiat Labour Inatsisartut Underhusiani amerlanerussuteqalersoq kisitsinerup kingulliup takutippaa. Partii taassuma qinigaaffiit 412-it maannamut qulakkeereerpai.

Det Konservative Partiip qinigaaffiit 121-t qulakkeerpai. Underhusetimi qinigaaffiit 650-iupput.