Sumiissusersiornermut atortorissaarut nutaaq Maniitsumut timmisartuussinerit taamaatinneqartut ikilinissaannut qulakkeerutaassasoq

Maniitsumiit Maniitsumullu timmisartuussinerit ukiup affaani kingullermi ajornakusoorsimapput.

Atortorissaarummi immikkut ittoq Distance Measuring Equipmentimik (DME) taaguuteqartoq novembarimili aserorsimavoq.

Tamanna pissutigalugu timmisartut sila ajoraangat erseqqarinngikkaangallu minniartarnerat ajornakusoorsimavoq.

Atortorissaarummi timmisartumi aquttut timmisartup sumiinneranik naliliinissaannut miffissamullu ungasissutsimik naatsorsuinerannut iluaqutaasarpoq, taamaalilluni sila ajoraluarpalluunniit mittoqarsinnaalluni.

Maniitsup mittarfiani AFIS-operatøri, Hans Hendrik Isaksen oqarpoq.

- Taanna timmisartuninngaaniit atorneqartarpoq. Taava radionavigationsudstyr-iuvoq. Taamaasilluni timmisartuminngaaniik attavigisarpaa uteqqinneranilu taamaasilluni timmisartup atortorissaarutaata naatsorsorsinnaallugu qanoq ungasitsiginersugut.

Timmisartut sumiissusersiornermut atortorissaaruteqartinnagu aatsaat erseqqarikkaangat timmisartumilu aquttut namminneerlutik mittarfik tamaat takusinnaagaangamikku Maniitsumut missinnaasarput. Assi © : Paalu Møller / KNR

Taamaammat aamma timmisartuussinerit arlallit ukiup affaata kingulliup ingerlanerani silarlukkaangat taamaatiinnarneqartariaqarsimapput.

Atortorissaarut pisoqalisoq

Sumiissusersiornermut atortorissaarut pisoqalingaatsialersimammat taarserneqarnissaa pilersaarutaareersimasoq AFIS-operatørip oqaatigaa.

- Nutaanngilineranik taanna peqqutaasimanissaa ilimagilluarsinnaavarput. Pissutigalugu ukioq 2024-mi taarsersortussaagami pilersaarutitut. Taava sioqqutilaarlugu tassuunnakkut aserfallassimalluni.

Atortorissaarutip taarsersornera suliassaangaatsiarpoq, taamaammat qaammatit arlallit suliarineqarluni. Atortorissaarummik eqqortumik pissarsinerup sanitigut taakku ikkunneqartussaavoq, misilittarneqartussaavoq akuerineqaqqaartussaallunilu.

Mittarfeqarfiit atortorissaaruserisuisa atortorissaarutip nutaap ikkussornera suliaraat. Naammassimmat nunatta avataaniit tikisitsillutik misilerartikkaat, Hans Hendrik Isaksen oqarpoq.

- Majip qeqqaninngaaniik majip naaniissaata tungaanut ikkussorlugu suliarivaat. Taava junip ingerlanerani Islandiminngaaniik timmisartuaraq misileraajartorluni tikippoq.

Maannalu aaqqeqqissimalerpoq. Timmisartut taamaalillutik silagikkaangat silarlukkaangalluunniit Maniitsumut Maniitsumiillu angallassisinnaaleqqillutik.