Sumekkunnik nersorinninniarluni tusarnaartitsinissamut isissutissat tamakkerlutik pisiarineqartut
![](/sites/default/files/styles/image_934x467/public/2024-04/Illeq%2C%20KNR%2004.04.2024%20Still.jpg?itok=vxnca4Mx)
Piareersalernermiit ukioq ataaseq qaangiutilillartorlu nipilersoqatigiinnik nuannarineqarluartunik Sumekkunnik nersorinninniarluni Nuummi kulturip illorsua Katuami unnummut kiisami tusarnaartitsisoqassaaq.
- Nipilersoqatigiit Sumekkut taamaaliornissamik ukioq ataaseq sinnerlugu akuersitinniarsarereerlugit qaammatit sisamat qaangiuttut iluatsikkatsigu ingerlaannarluta piareersalerpugut, Katuap pisortaa Ivaaq Kriegel oqarpoq.
Unnummullu tusarnaartitsinissamut isissutissanik pisisimasut 1.000-ngajalluinnaasut puigunaatsorsissagunavittut, pisortaq oqarpoq.
- Sumekkut nipilersoqatigiittalernerminniit ukioq manna ukiunik 51-nngortorsiorput, siornali ukiunik 50-nngortorsiornerat malunnartinneqanngimmat unnummut malunnartinniarparput, Ivaaq Kriegel oqarpoq.
Nipilersoqatigiitoqqat – nutaamik aaqqissuussineq
Tassa Sumekkunnik nersorinninniarluni tusarnaartitsisoqaannarnani nalliuttorsiornerat aamma malunnartinneqassaaq. Unnummullu scenep aaqqissuunneqarnera siornatigutulli inngitsoq, pisortaq oqarpoq. Sumekkummi nersorinnitsitik namminneq qaqqiveqarlutik isiginnaassavaat, scenemulli namminneq aamma qaqisassallutik.
Nipilersuusiatilli sorliit atussaneraat isertuussaagallarpoq.
![](/sites/default/files/styles/image_934x467/public/2024-04/Illeq%2C%20KNR%2004.04.2024%20Still_2.jpg?itok=8ETn6no5)
Katuami tusarnaartitsisoqartillugu isilernermi aamma akiliisoqarsinnaasaraluarpoq, taamaaliornissarli unnummut ajornarluni. Unnummummi tusarnaartitsinissamut isissutissat tamakkerlutik marsip 22-anili pisiarineqarsimalereertut, Ivaaq Kriegel oqarpoq.
- Unnummut qilanaarpunga, Sumekkummi unnummut sassareerunik kingorna tusarnaartitseqqikkumaartut ilimaginngilara. Taamaammallu peqataanissamik akuersimmata nuannaaqaanga, pisortaq oqarpoq.