Suloraq ingerlaarnermut pilersaarummut ilanngunneqassaaq
Nuup ineriartornera sukkasuupilussuuvoq, najugaqarfeqarfiillu nutaat illoqarfiup qeqqani suliffeqarfinnit ungasilliartuinnartumi pilersinneqartalerput, tamannalu Kommuneqarfik Sermersuumut Nuup Bussiinullu unamminartupilussuuvoq. Illoqarfimmi angallannikkut pissutsit, kommunip, bussiutileqatigiiffiup COWI-llu suleqatigiillutik maannakkorpiaq annertuumik misissuiffigaat.
-Misissuineq piffissami qanittumi naammassissavarput, tamatumalu kingorna misissuinerup inerneri kommunalbestyrelsimi politikkikkut suliarineqassapput. Suliaq tassani naammassineqariarpat inerniliussat ingerlaarnermut pilersaarutitsinnut ilanngutissavagut. Najugaqarfeqarfimmut Suloqqamut tunngatillugu, politikerit isummernissaat utaqqisinnaasimanngilarput, taamaammat utaqqiisaasumik aaqqiissuteqarfigaarput, tassani najugaqartut piffissami ulapaarnerpaaffiusumi sullinneqarsinnaanngorlugit, Nuup Bussiini pisortaq Michael Driefer knr.gl-imut oqarpoq.
Nuuk Centerip pilersinneqarnera aamma Nuup Bussiinut unamminartunik nutaanik annertuunillu pilersitsivoq, bussilli 1A-p ingerlaartarnissaanik nutaamik pilersitsinikkut amerlanersaat iluarsineqarsimapput. Bussi illoqarfiup qeqqatigoorani, Katuap eqqaatigoorluni Nuuk Centeriliartalissaaq, ilaasullu aqqusineq ikaaqqaanngikkaluarluarlugu centerimi pisiniarfinnukarsinnaalissallutik.
-Nuuk Centerimukartut taama amerlatiginerat tamanit tupaallaatigineqarsimavoq, bussili 1A atorlugu pitsaasumik atorsinnaasumillu aaqqiissuteqarpugut. Bussip ullukkuinnaq ingerlaartarnissaa nalunngilara, pilersaarutitsinnili amigaataasoq taamaasilluta iluarsivarput. Suloqqamut ingerlaartarnissat amerlanerusut Nuuk Centerimullu qaninnerusumik unittarnissaq politikerit aalajangiiffigissavaat, Michael Driefer oqaluttuarpoq.
Suloqqami najugaqartut amerlanersaat Namminersorlutik Oqartussani imaluunniit Issittumi Sakkutooqarfimmi atofeqartuupput, taamaattumillu suliartuleraangamik angerlaleraangamillu pisortat assartuutaat pisariaqartittupilussuullugit. Bussip 1A-p unnukkut sapaatip akunneratalu naanerani ingerlaartannginnissaa nutaamillu aqquteqalernera najugaqartunut unamminartunik nutaanik aamma pilersitsissaaq. Issittumi Sakkutooqarfimmi sulisut suliartoraangamik bussimut allamut ikisariaqartassapput, perorsaasullu, peqqissaasut allallu nikingasunik suliartortarfeqartut unnukkut sapaatip akunneratalu naanerani illoqarfimmi qummukajaat sivinganersaatigut pisuttariaqartarnissartik akueriinnartariaqassavaat.
-Persertillugu Suloqqamut puussianik nassartaqarluni majuarnissaq nuannerpallaanngitsoq nalunngilara, taakanili najugaqartunut utaqqiisaasumik aaqqiissuteqartariaqarluta naliliisimavagut. Pitsaanerpaanngilaq, suliniutittali qujarunneqarnissaa qularutiginngilara. Sinnera kommunip sulisuinit aalajangiiffigineqartussaassaaq. Suliniutit nutaat ingerlaarnermut pilersaarutitsinnut piaarnerpaamik ilanngussinnaassallutigit neriuutigaara, sanaartornikkulli aningaasaliinissamik pisariaqartitseratarsinnaavoq, tamannalu utaqqeqqaartariaqassavarput, Michael Dreifer Nuup Bussiineersoq nassuiaavoq.
