Sullitat pasinarsinnaasut 6200-t Danske Bank aqqutigalugu aningaasanik nuussisarsimasut
Sullitat 6200-t pallillugit aningaasanik pasinarsinnaasunik Danske Bankip Estlandimi immikkoortortaqarfiani nuussisarsimapput.
Aningaaseriviup misissuinerata tamanna takutippaa. Danske Bankimi Estlandimi sullitat ilaasa aningaasanik peqquserluttuliornikkut pissarsianik 2007-ip 2015-illu akornanni malunnarunnaarsaasarsimanerat, aviisip Berlingske Businessip mississuiffigisimavaa, suliarlu maanna tassa tamaanga killikkallarluni.
Sullitat nunanit allaneersut 3000-it missaat Danske Bankip Estlandimi sullinneqartut aviisip eqqoriarpaa, aningaaseriviulli nammineq misissuinerata takutippaa sullitat nunanit allaneersut 10.000-it missaanniittut, taakkunanngalu 6200-t missaat pasinarsinnaasunik nuussisarsimanerat paasineqarpoq.
Aningaasat ikinnerpaamik 53 milliardit koruunit, Danske Bankip Estlandimi immikkoortortaqarfia aqqutigalugu nuunneqartarsimanerat Berlingske Businessip eqqoriarpaa.
Aningaasat qasserpiaat peqquserluttuliornikkut Danske Bank aqqutigalugu nuunneqartarsimanersut, Danske Bankip nammineq qulaajarsinnaasimanngilaa.
/ritzau/