PITUFFIK Sullissinissamut isumaqatigiissut pillugu danskit qanoq suleriaaseqarsimanerat apeqqutigineqassaaq
![](/sites/default/files/styles/image_934x467/public/article_images/aaja_chemnitz_larsen_foto_ia_folketingimi_4.jpg?itok=HcZT-hsf)
Suleqatigiissitat Pituffimmi kiffartuussinissamik isumaqatigiissutip nunatsinnut qanoq annerpaamik iluaqutaanissaanik misissuisussat siorna pilersinneqarput.
Suleqatigiissitalli taakkua marluk Nunatsinneersunik, Danmarkimeersunik USA-meersunillu inuttallik ammanerusumik sulinissaat folketingimi ilaasortat Aaja Chemnitz Larsenip aamma Christian Juhlip ujartorpaat.
Aamma atuaruk Aajap danskit ministeriat Pituffik pillugu isumasioqatigiinnissamut aggersarpaa
- Matumunnga tunngasumik Naalakkersuisuniit danskillu naalakkersuisuiniit tusarattali sivitsulerpoq.
USA-mi aalanjangiisoqarnissaanut qanillinera oqaatigissallugu pingaarpoq. Suleqatigiissitalli ukua pillugit qanoq pisoqarumaarneranik suli tusagaqanngilagut. Nunatsinni aningaasaqarnikkut kinguneqarnerlussinnaanera annilaangatigaara. Taamaammat Pituffik pillugu ammanerunissaq maqaasivara, Aaja Chemnitz Larsen oqarpoq, nangillunilu:
- Nunatta qanoq suleriaaseqarsimanera nalunaarusiami paasereerparput. Taamaammat Danmarkimi nunanut allanut tunngasunut ministereqarfiup qanoq suleriaaseqarsimanera qulaajassallugu pingaartipparput, nunarpullu siunissaq isigalugu aningaasanik annaasaqarpallaannginnissaa qulakkeerniarneqarluni.
Pituffik pillugu aqagu pingasunngornermi, martsip pingajuanni, isumasioqatigittoqassaaq.