Qaasuitsup Kommunia: Sulisorineqartussat inissaqartinneqassapput
Qaasuitsup Kommuniani qitiusumik allaffeqarfimmi atorfiit 129-t avinniarsaraat. Maannakkullu inernerugallartoq tassaavoq, Avannaata Kommuniani atorfiit, inuttaqanngitsut ilanngullugit, 75-it missaanniissasut taamatullu aamma Kommune Qeqertalimmi atorfiit 54-it missaanniissallutik.
Sulisut 22-t maanna Ilulissaniittut Aasianni sulilernissamik neqeroorfigineqarput.
Avannaata Kommunia
Atorfiit inuttassaqareersut: 63
Atorfiit inuttaqanngitsut: 12
Kommune Qeqertalik
Atorfiit inuttassaqareersut: 43
Atorfiit inuttaqanngitsut: 11
Kommunimi qitiusumik allaffeqarfimmi atorfiit 129-t avinneqassapput. Taassuma saniatigut ilaatigut eqqiaasut, pedelit, sungiusaatigalugu sulisut nutserisullu ilanngunneqarpata kommunini marlunni sulisut 143-t missaanniilissapput.
Atorfiillu Aasiannut nuunneqarpata sulisut inigisassaat aamma isumagineqarsimasussaapput.
Kisiannili aamma qitornaqarpata paaqqinnittarfinni inissaqartinneqartussaasut, Qaasuitsup Kommuniani pisortaaneq oqarpoq.
AAMMA ATUARUK Sulisut 22-t nuunneqassapput
- Soorunami tamaasa eqqarsaatigalugit suliat ingerlanneqarput. Aamma qulakkeerniarsimavagut nuukkunik inissaqartinneqarnissaat, taakkulu isumaqarpunga isumannarpallaarunnaalersut, Qaasuitsup Kommuniani pisortaaneq, Hans Eriksen, KNR-ip aallakaatittagaanut Inuiaat Tillernerannut oqarpoq.
Sulisut Qaasuitsup Kommunianeersut Kommune Qeqertalimmut nuussinnaanissamik neqeroorfigineqartut naaggaarsinnaasut, pisortaaneq erseqissaavoq.
AAMMA ATUARUK Sulisut kommunimi siunissaminnik paasitinneqartut
Tamatumali suna kingunerissaneraa oqaatigiuminaattoq, aamma oqarpoq.
- Ersarinnerusumik oqaatigisinnaanngilara. Kisianni tunngaviusumik isumaqatigiissutit atorlugit suliassat suliarineqalertussaasapput.
Atorfiilli sorliit nuunniarneqarnersut kommunip suli oqaatigisinnaanngikkallarpaa:
- Suli tamakkerlugit attavigineqanngillat, suli kalerriortuivugut, amigaatigineqarlutik feriartut allatigullu patsiseqarlutik sulinngiffeqartut, Qaasuitsup Kommuniani pisortaaneq, Hans Eriksen, oqarpoq.
