Sulisitsisut Peqatigiiffiat GA - GE-mik taaguuteqalerpoq
Taama allanngortitsinikkut ersersinniarneqarpoq, peqatigiiffik sulisitsisut peqatigiiffiattut, isumaqatigiissutinik nutarterinermik annermik suliaqartussatut suliaqarunnaarluni, soqutigisaqaqatigiiffittut inuussutissarsiornermut tunngasunik annerusumik suliaqalersimanera.
Peqatigiiffiulli taaguutaa allanngortinneqaraluartoq, politikkia allannguuteqanngilaq. Siulittaasup Henrik Lethip sinniisitut aallartitat ataatsimiinneranni, ukiuni tulliuttuni marlunni atuuttussatut qinigaaqqittup erseqqissaqqippaa, pissutsit ilorraap tungaanut aallarteqqinneqassappata, sulisitsisut peqatigiiffiata piffissami sivitsortumi ilaatigut pisortat sipaarniuteqartariaqarnerat, allaffissornikkut ingerlatsinermi naammassisaqarsinnaanerup pitsaanerulernissaa minnerunngitsumillu inuussutissarsiortunut atugassarititaasut paasiuminarsarneqarnissaat pisariaqartut.
- Pissutsit qarmami allaasakkatut ersaritsigipput: Ajornartorsiorneq najummassimanarpoq - sakkortusiartorlunilu. Naalakkersuisut Pituffimmit isertitaat ikinnerulissapput, ukiut siuliinut naleqqiullugit kinguppattassiissutit ikileriangaatsiarput, piffissami qaninnermi aatsitassarsiornermut pilersaarutit nutaat ikittuinnaapput, taakkulu qaavisigut utoqqaat amerliartorput inuillu sulisinnaasut ikiliartorlutik, Henrik Leth oqarpoq.
- Tamatuma kinguneranik aningaasartuutit isertitanit amerlanerulissapput. Sipaarniartoqartariaqarpoq, aamma pisortat aningaasaqarnerat sakkortuumik aqunneqarlunilu aalajangiussanik malinnittoqartariaqarpoq. Aamma Naalakkersuisut 2015-imit aallartittumit allaffissornikkut sipaarniutissat 50 millionit koruuniusut, suminngaanniit sipaarniutaassanersut suli oqaatiginngilaat, Henrik Leth oqarpoq ilanngullugulu erseqqissarlugu Kalaallit Nunaat utaqqeqqinnissaminut akissaqanngimmat.
- Nalorninartoqaraluartunut aningaasaliisartut nunarsuarmiunit tamanit pilerngunneqarput. Tatiginassuseq matumani pineqarpoq. Naalakkersuisut ineriartortitsisariaqarput iluarsartuusseqqinnerillu piaartumik aallartinneqarsinnaasut suliaralugit - taamaaliunngikkuttami aningaasarsiornikkut inooqatigiinnikkullu ammuinnaq ingerlassaagut, Henrik Leth sinniisitut aallartitanut nalunaarummini taama erseqqissaavoq.
