Sulisilluni ajoquserneq pillugu Sullissiviup misilittagai allannguiniarnermut siunnersuummut tunngaviuvoq
![](/sites/default/files/styles/image_934x467/public/article_images/arbejdsskade_1.jpg?itok=OCwx1qNB)
Siunnersuut inuussutissarsiornermut, suliffeqarnermut, niuernermut nunanullu allanut Naalakkersuisumit, Vittus Qujaukitsumit, qaqinneqarpoq sulisillunilu ajoqusersinnaanermut isumannaarinermi inatsit atuuttup teknikkikkut allannguiffiginiarpaa.
Allaffissornikkut pisariillisaaneq
Teknikkikkut allannguiniarnerup Innuttaasunut sullissineq pitsanngorsaaviginiarneqarneranut siunertaavoq.
Nunatsinni peqqinnissakkut sullinneqarsinnaanngitsut, soorlu Nunatsinni najugaqartutut allaqqannginneq pissutigalugu, ajoqusersinnaanermut isumannaarinerup Peqqinnissamut Isumaginnittoqarfiup ajoqusersimasunut aningaasatigut pisussaatitaaffia taarsernavianngikkaa inatsimmi erseqqissaassutigineqarpoq.
Tamatuma saniatigut sulilluni ajoqusertoqarsimatillugu ajuqusersimasup misissorneqarnissaanut nakorsartinnissaanullu angalanissaanut Arbejdsskadestyrelsip naalagaaffiup piginngisaanik sillimmasiisarfimmit akilerneqartumit angalanissamik aaqqissuussisunik atuisinnaasoq inatsimmut ilanngunneqarniarpoq.
Sapaatip akunneri sisamat sivikippallaarpoq
Arbejdsskadestyrelsip pisortaa Namminersorlutik Oqartussallu isumaqatigiinninniarnerata kingornatigut nammineq nakorsartitsinermut aalajangiinerillu pillugit naammagittaalliorsinnaatitaaffinnut malittarisassaliorsinnaasoq aamma ersersinniarneqarpoq.
Aamma ersersinneqarniarpoq, naalagaaffik, Namminersorlutik Oqartussat kommunillu Sulisilluni ajoquserneq pillugu Sullissivimmit sullinneqarnertik namminneerlutik akilissagaat.
Suliat pillugit naammagittaalliornissamut piffissaliussaq Danmarkimi piffissarititaasumut assingulersinniarlugu sapaatip akunneri arfinilinninngaanniit sapaatip akunneri sisamanut aallaqqaammut siunnersuutigineqaraluartumi sivikinnerulersinneqarniaraluarpoq.
Tusarniaanermili ilaatigut IMAK-ip tamanna iluarinagu nalunaarutigimmagu naammagittaalliornissamut piffissaliussaq, Nunatta isorartussusia, innuttaasullu siammasinnerat pissutaalluni
allanngortinneqassanngitsoq Naalakkersuisut innersuussutigaat, partiit sinnerinit taperserneqartumik.
Siunnersuut apriilip 28-ani aappassaaneerneqassaaq.