Kuannersuit Suliniutip inuiaqatigiinnut tunngasunut kingunerisai pillugit nalunaarusiaq akuerineqarnissaminut piareerpoq

Kuannersuarni aatsitassarsiornermik suliniut pillugu VSB-mik nalunaarusiap tuluttoornera Inuussutissarsiornermut Nukissiuuteqarnermullu Naalakkersuisoqarfimmit akuerineqarpoq. Naalakkersuisoqarfik isumaqarpoq inatsisitigut piumasaqaatit massakkut naammassineqartut.

Greenland Minerals nittartakkamini allappoq Kuannersuarni aatsitassarsiornermik suliniutip inuiaqatigiinnut tunngasunut kingunerisai pillugit nalunaarusiaq - VSB-mik nalunaarusiamik (inuiaqatigiinni piujuartussamik iluaqutaasumik sunniutaasussanik nalilersuinermik) taaneqartartoq - tamanut tusarniutigineqarnissaminut massakkut piareersoq. 

Kujataani aatsitassanik qaqutigoortunik uranimillu piiaaffiliornissamut inaarutaasumik qinnuteqarnissap tunniunnissaanut alloriarnerit ilagaat.

- Inaarutasumik akuerineqarnissamut suliaqarnitsinni alloriarneruvoq pingaaruteqarluinnartoq pitsaalluinnartorlu, Greenland Mineralsimi pisortaaneq, John Mair,  KNR-imut oqarpoq. 

AAMMA ATUARUK Ajornartorsiutaasut VVM-imi qarsupinneqarput

Inuussutissarsiornermut Nukissiuuteqarnermullu Naalakkersuisoqarfimmi pisortaanerup, Jørn Skov Nielsenip, KNR-imut ilumoornerarpaa VSB-mik nalunaarusiap tuluttoortaa naalakkersuisoqarfiup akuerigaa:

- Naliliinerput naapertorlugu nalunaarusiap inatsisitigut piumasaqaatinik naammassinnissimanera pillugu oqaaseqarfigereerparput, oqarpoq. 

Jørn Skov Nielsen nassuiaavoq kalaallisuumut qallunaatuumullu nutsernera atuarneqaqqaassasoq, Naalakkersuisunut nalunaarusiat akuerisassanngorlugit nassiutsinnagit. Tamanut tusarniaassutigineqartinnagit Naalakkersuisunit akuerineqaqqaassapput. 

John Mairillu oqaatigaa nalunaarusiat nutserneqarneri ullualuit ingerlanerini naammassineqassasut. 

Aamma erseqqissaatigaa tamanut ammasumik tusarniaanerit maanna sulissutigineqartussanngortut, taakkunanilu innuttaasut illuatungeriillu allat nalunaarusiaq pillugu apeqquteqarnissaminnut periarfissaqasut:

- Kujataanukarnissara qilanaareqaara. Kujataani innuttaasunut oqartussanullu atassuteqarnerput suliffeqarfitsinnut pingaaruteqartupilussuuvoq taamatuttaarlu piiaveqarnikkut suliniuteqarnitsinnut tunngatillugu inuiaqatigiinnut akisussaaffeqarnitsinnut, pisortaaneq oqarpoq.

AAMMA ATUARUK Avatangiisit pillugit aarleqquteqarneq VVM-imik nalunaarusiami akerlilerneqartoq

Mairip erseqqissarpaa sulineq massakkut tamanut tusarniaassutigineqarnissamut satinneqassasoq, tassani innuttaasut suliamullu akuusut allat nalunaarusiamut apeqquteqarsinnaassapput:

- Kommune Kujallermik qanittukkut isumaqatigiissuteqarnitsinni allassimasutut taassuminnga attaveqaqatigiinnerput nukittorsarniarparput, aamma inuiaqatigiinnut sunniutit, iluaqutaasut periarfissaasullu, pisortatigoortumik ilisaritissallugit oqaluuserissallugillu. 

Kuannersuarni aatsitassarsiorfeqalissappat oqallisaanerpaavoq aatsitassarsiorfik avatangiisinut qanoq sunniuteqassanersoq. ASN-imik (Avatangiisinut Sunniutinik Nalilersuineq) nalunaarusiaq Naalakkersuisunit akuerineqarnissaminut suli piariinngilaq. 

Aatsitassanik Suliassaqarfinnut Avatangiisinut Aqutsisoqarfimmi pisortaq, Najaaraq Demant-Port, paasissutissiivoq Greenland Mineralsip ASN-imik nalunaarusiap inatsimmi piumasarineqartunik naammassinninnissaanut naqqiutit nutaanillu ilanngussinissaq suli utaqqineqartoq. 

John Mair naapertorlugu VVM-imik nalunaarutip tunniunneqarnissaanut atugassat kingulliit sapaatit akunnialui qaangiuppata piariissapput.

AAMMA ATUARUK GME-p pisortaata VVM-imut missingiutip isornartorsiorneqarnera akerlileraa

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat