Suliniutinut angisuunut inatsisip piumasaqaatai allanngortinniaraat

Suliniutinut angisuunut inatsit nunatsinni suliniutinut angisuunut pilersaarutit unammillerluarsinnaaneruleqqullugit nunatsinnullu aningaasaliisinnaanerit periarfissagissaarneruleqqullugit 2013-imi atuutilersinneqarpoq. Suliffeqarfiit suliniutini angisuuni sanaartornerup nalaani nunani allaneersunik, nunatsinneersunit akissarsiakinnerusunik, sulisoqarsinnaapput.

Suliniutinulli angisuunut inatsit iluaqutigerusukkaanni piumasaqaatit qaffasippallaartut ersersimavoq. Taamaammallu suliniutit inatsimmi taama angitigisariaqarunnaarnissaat inatsimmi allannguutiginiarneqarpoq. Ullumikkut suliniutigineqartut suliniutitut angisuutut taaneqassagunik 5 milliardit koruuninit akisunerussapput. Inatsimmi allannguutissatut siunnersuummi 1 milliardinut apparniarneqarpoq.

Tamatuma saniatigut sanaartorfimmi suliassat allat, assersuutigalugu nerisarfimmik ingerlatsineq eqqiaanerlu, suliniutinut annertuunut inatsisip ataaniitinniarneqalerput. Suliassanimi taakkunani nunatsinneersunik sulisussarsiniarneq ajornakusooreersoq, Naalakkersuisut siunnersortaanni pisortap, Jens Hesseldahlip oqaatigaa.

Suliniutini mikisuni aamma sulisussaaleqisoqartoq

Suliniutinut angisuunut inatsisip allannguuteqarnissaanut siunnersuut sulisitsisut iluaraat. Nunatsinnili suliniutini mikisuni aamma sulisussaaleqisoqartarnera Naalakkersuisunit misissuiffigineqartariaqartoq, allattoqarfimmi pisortaq, Karsten Lyberth-Klausen isumaqarpoq.

- Suliniutinut angisuunuinnaq pinnani inuussutissarsiornermi malittarisassanik ajornaannerusunik atuutsitsilertoqartariaqarpoq, suliffeqarfigummi sulisussanik pisariaqartitsipput,

Karsten Lyberth-Klausen oqarpoq, kalaallillu suliffeqarfiutaanni ilinniarsimasut ilinniarsimanngitsullu amigaataanerannut Sulisitsisut kisitsisaataat innersuussutigalugit.

Suliniutinut angisuunut inatsisip allannguutitassai piviusunngussappata, aatsitassarsiornernut erngullu nukinganik suliniutinut tamanna pingaaruteqassaaq, kisianni mittarfiliornissamik pilersaarutinuunngitsoq .

Siunnersuut Inatsisartut aappaagu upernaakkut ataatsimiinnissaannut saqqummiunneqassasoq naatsorsuutigineqarpoq.