Suliniutini annertuunut inatsit utaqqisaavoq
![](/sites/default/files/styles/image_934x467/public/article_images/inatsisartut_aabning630_1.jpg?itok=tXtKtiG1)
Suliniutinut angisuuni suliassat pillugit inatsisissatut siunnersuut, Alcoallu Maniitsup eqqaani aatsitsiviliorsinnaanissaanut atatillugu Naalakkersuisut Alcoamik oqaloqatiginninnermik nangitsinissamut pisinnaatitaanissaannut siunnersuut ataatsimut kattunneqarput, naallu suliniutinut angisuunut suliassat pillugit siunnersuutip aappassaaneerneqartinnagu ataatsimiititaliami sukumiisumik suliarineqarnissaa partiit tamarmik innersuussutigigaluaraat, Inatsisartut aatsaat aappaagu upernaakkut ataatsimiinnissaannut atatillugu aappassaaneerneqarnissaa Siumup piumasaraa.
Inuiaqatigiittulli atugarissaartutut inissisimaannassagutta suliniutinik angisuunik Nunatsinni pisariaqartitsisugut Inatsisartuni ilaasortat oqaatigaat. Soorlu Inuit Ataqatigiit politikkikkut oqaaseqartartuat Aqqaluaq B. Egede oqaaseqarnermini ima oqartoq:
- Qularnanngilaq aatsitassarsiorfiit itigartissagaluarigut allatigut Nunatta aningaasartuutissaasa annertoqataannik isaatitsivissaqarluta matussusersinnaasuugutsigit. Kisianni piviusoq allaavoq, Aqqaluaq B. Egede, IA-meersoq oqarpoq.
Inatsisartut siunnersuut nalunaaquttap akunnerit tallimaata affaani oqallisigaat, Inuussutissarsiornermullu ataatsimiititaliami suliarineqarnissaanut innersuussillutik, suliniutilli angisuut pillugit suliassat annertoqimmata siunnersuutip innuttaasunut tusarniaassutigineqartariaqartoq Siumut isumaqarpoq, aatsaallu aappaagu upernaakkut aappassaaneerneqarnissaa piumasaralugu.
Siumukkulli taama nalunaaruteqarnerat, Inuussutissarsiornermut aatsitassarsiornermullu naalakkersuisumit Ove Karl Berthelsenimit isumaqatigineqanngilaq. Suliniutinimmi angisuuni suliassat pillugit inatsisissatut siunnersuut kinguartinneqassappat, taava Alcoamut tunngasut aamma kinguartinneqartariaqassasut, Ove Karl Berthelsen oqarpoq.
- Suliniutinut angisuunut atatillugu inatsiseqanngikkutta, taava Alcoamik oqaloqateqarsinnaanngilagut. Tassa imaappoq, suliniutini angisuuni suliassat pillugit inatsisissaq kinguartinneqarpat, taava Alcoamik oqaloqatiginnissinnaanerit aamma kinguartinneqassapput, Aatsitassarsiornermut naalakkersuisoq Ove Karl Berthelsen Sermitsiamut oqarpoq.
Suliniutini angisuuni suliassat pillugit inatsisissatut siunnersuut pilersaarutit naapertorlugit novembarip ulluisa 13-iani aappassaaneerneqassaaq.