Suliniaqatigiiffik Læger Uden Grænser immamut akullersuarmukartitsipput

Nakorsat killeqarfiit akimorlugit suliniaqatigiifiata Læger Uden Grænser-ip umiarsuaq atugaa, "Aquarius" akullersuarmi decemberip qaammataani atorunnaarpaat, maanna umiarsuarmik allamik immamut akullersuarmukartitsipput.
Assi © : Læger uden Grænser
Allattoq Ritzau
juulip 21-at 2019 14:34
Nutserisoq Jaaku Lyberth

Umiarsuup taassuma qimaasut nunasiniallu akullersuakkut ikaarniarsarisut, ingammik Libyameersut annaanniartussaavai, suliniaqatigiiffik taama nalunaarpoq.

Suliniaqatgiiffiit taakkua marluk umiarsuaq ´Aquarius` angallatigalugu decemberi 2018 tungaanut akullersuarmiipput, qimaasunik tigusisarlutik Europamilu umiarsualivinnukaattarlugit.

Sulianiaqatgiiffiit umiarsuarmik ¨´Aquarius` -mik angallateqarnerat Italimami pisortanit unitsinneqarpoq, Italiami oqartussaasut unnerluussimmata, umiarsuaq eqqagassanik 24.000 tonsitut oqimaassusilinnik unioqqutitsilluni Italiami umiarsuarlivinnukaassisarnerarmassuk.

Taama pisuutitsineq suliniaqatigiiffimmit Læger Uden Grænsermit ilumuunnginnerarneqarpoq.

Europami politiikerit kukkullutik politikeqarnerat pissutigalugu, suliniaqatigiiffiit suliniuteqarnerisigut norgemiut umiarsuaat ´ Ocean Viking` juulip naalernerani akullersuarmukartipaat.

Taama oqarpoq, annaassiniarnermi aqutsisoq aamma suliniaqatigiiffimmi Læger uden Grænserimi Lbyiami ilaasortaq Sam Turner.