Vittus Qujaukitsumik tatiginninngitsoqartoq: Naalakkersuisoqatigiit ikorfartortaasullu annaakkaat
Inatsisartut sisamanngornermi ataatsimiingaatsiareerlutit sulinermut ilanngaatip aappaagumit atulersinneqarnissaanut siunnersuut unnukkut oqallisigisussanngorpaat. Tassanili isumaqatigiikkunnaarput.
Tassami illua tungiliuttut aningaasaqarnermut naalakkersuisumik Vittus Qujaukitsumik (NQ) tatiginnikkunnaarnissamik siunnersuuteqarput.
Sulinermut ilanngaateqalernissaq qanoq ililluni atuutilersinneqassanersoq Naalakkersuisut aamma aningaasaqarnermut akileraartarnermullu ataatsimiititaliap isumaqatigiinngissutigimmassuk tamatumunnga peqqutaavoq.
- Naalakkersuisut amerlanerussuteqartut aalajangiinerat malinnianngilaat, taamaammat Naalakkersuisumut tatiginninngilagut, Partii Naleqqamit, Jens Napaattooq oqaluttarfimmit oqarpoq.
Naalakkersuisooqatigiinnit tapersersortaaniillu taperserneqartoq
Taamaammat ataatsimiinneq unitsinneqarpoq, partiit taamaalillutik tatiginnikkunnaarnermut isummerniassamata. Ataatsimiinneq nangeqqinneqarmat Siumut gruppiani siulittaasoq, Karl-Kristian Kruse oqalutarfimmukarpoq, tatiginnikkunnaarnermillu taasinissamik pinngitsoortitsissutaasussamik siunnersuuteqarluni.
Krusep naatsumik oqaatigaa partiit Siumup, Nunatta Qitornaasa Demokraatillu Vittus Qujaukitsoq suli tatigigaat. Vittus Qujaukitsup isornartorsiummut oqaluttarfimmit akissuteqareernerani tatiginnikkunnaarnermik taasititsinerup pinngitsoortinneqarnissaanut taasititsinermi 14-it akuersipput qulillu akerliullutik.
AAMMA ATUARUK Ataatsimiititaliap sulinermut ilanngaat kinguartinniaraa
Partiit Inuit Ataqatigiit, Atassut, Suleqatigiissitsisut Partii Nalerarlu tatiginnikkunnaarnissamut pinngitsoortitsinissamut taasinermi akerliusuupput.
Sulinermut ilanngaatip nutaap atulersinnissaata isumaqatigiinngissutigineqarnerani qarasaasiatigut atortut maanna atorneqartut pissutigalugit ilanngaatinik katersuisoqareernerani ukiup tullissaani aatsaat akiliuteqarsinnaanerannik pissuteqarpoq.
Ataatsimiititaliaq: Ukiumut 83 millioninik annaasaqarsinnaavugut
Tamanna pillugu innuttaasut amerlanerusut sulilissanersut Aningaasaqarnermut Akileraartarnermullu ataatsimiititaliap qularnartoqartippaa:
- Siunnersuutip sunniutissai pillugit Naalakkersuisut eqqoriaanerat eqquutissanngippat, Naalakkersuisut namminneq naatsorsuinerat aallaavigissagaanni, isertitassaraluanit annaasat ajornerpaaffimminniikkunik ukiurnut 83.000.000 koruunioratarsinnaapput. Ataatsimititaliaq siunnersuutip aappassaaneerneqarnissaanut isumaliutisiissummini taama allappoq.
AAMMA ATUARUK Suliffeqarnermi ilanngaat pillugu inatsisissatut siunnersuut tusarniaassutigineqaleruttortoq
Ataatsimiititaliap taamaammat sulinermut ilanngaatip atulersinnissaa, ilanngaaatip qaammatikkaartumik tunniunneqarsinnaalernissaanut utaqqissutteqquaa, Naalakkersuisulli tamanna naalakkersuisooqatigiinnissamik isumaqatigiissummi qitiummat itigartitsissutigaat:
- Naalakkersuisut sulinermut ilanngaatit 2020-mit atuutilernissaannut naalakkersuisooqatigiinnissamik isumaqatigiissutigalugu tamanut neriorsuutigisartik attattariaqarpaat, Vittus Qujaukitsoq oqarpoq.
