Suliffissuit arlallit sulisunik allamiunik tikisitserusuttut
Polar Seafood Aasianni suliffissuarminut Litauenimiunik qulinik tikisitsinissaminik pilersaaruteqarpoq. Siorna illoqarfimmit naammattunik sulisussarsisinnaannginnami aamma taamaaliortariaqarsimavoq.
Pisortap Jan Weinreichip erseqqissaatigaa Aasianni sulisutik iluarisimaarluarlugit, tunisassiornerulli ingerlaannartinnissaanut sulisussanik tikitsinissaq pisariaqartoq.
AAMMA ATUARUK Kineserit suleqatigalugit nuannaraat
Kitaa Seafood Nuummiittoq filippinerimik ataasiinnarmik maannakkorpiaq sulisoqarpoq.
- Amerlanerunissaalli kissaatigigaluaqaarput, Kitaa Seafoodimi siulersuisut siulittaasuat Robert Møller AG-mut taama oqarpoq.
Ingerlatseqatigiiffik tunisassiorfimmik anginerusumik sanaartornialeruttorpoq, sulisullu marloriaatinngortinneqarnissaat pisariaqartinneqassaaq, tamatumunngalu allamiunik 20-nik atuisinnaagaluarpugut, Robert Møller, Kommuneqarfik Sermersuumut maanna isumaqatigiinniartoq taama oqarpoq. Kommunimimi sulisussanik pissarsiassaqanngitsoq oqaatigaa.
AAMMA ATUARUK Asiameersut 27-t sulilersinneqartut
Ilulissani pissutsit aamma taamaapput.
Halibut Greenlandip pisortaa, Niels Thomsen, AG-mut oqaluttuarpoq filippinerinik sisamanik maannakkorpiaq sulisoqarlutik, ataatsimillu ilaneqartussaasut. Amerlanerusunilli tikitsisinissaq pilersaarutigineqarpoq, qassiussanersulli Halibut Greenlandip suli aalajangersimanngilaa.