Siumut: Suliffissarsiortuni kalaallit salliunneqassapput
Nunatsinni partiini annerit tulliata Siumup Qasigiannguani ataatsimeersuarnerani ulluni pingasuni eqqartukkat amerlapput. Immikkoortortaninngaanniit siunnersuutigineqartut katerisimaarnermi oqallisigineqarluarput –pingaartumik immikkoortortaqarfimmit ataatsimit siunnersuutigineqartut immikkut ittumik maluginiarneqarput – tassa siunnersuutit Nuummi immikkoortortaqarfimmeersut.
Nuummi immikkoortortaqarfimmeersut siunnersuutit katillugit 26-iupput, siunnersuutinilu taakkunani sammisaq aalajangersimasoq oqallisigineqarluarpoq. Tassa nunanit allaniit nunatsinnukartut nunap pisuussutaanik kalaallit qaangiinnarlugit tigoqqaasut.
Tamatumalu pinnginnissaa qulakkeerniarlugu Siumut Nuumminngaanniit nunanit allameersut suliffissarsiortuni tulleriiaarnermi siulliussanngitsut.Nuummi Siumup immikkoortortaani siulittaasoq, Qarsoq Høegh-Dam oqarpoq:
- Kalaaleq arlaatigut salliunneqarsinnaatitaassaaq. Qanorpiaq tamanna piumaarnersoq inississaqqaarparput. Kisianni suliffissaqarpat, kalaalerlu atorfimmut piginnaasaqarpat, soorunami taava salliunneqarnissaanik najoqqutaqartariaqarpoq.
Tulleriiaarnermi kalaallit salliunneqartuartassapput
Amerlavallaat sivikippallaamik maaniittarput. Amerlavallaartut akissarsiakippallaarput. Tamanna suliffissaqartitsiniarnermi pissutsinik naleqqutinngitsunik kipusoortitsivoq, aamma nunaqavissut malinnaasinnaanissaannut aporfeqalersitsivoq, nunaqavissullu nunani alleneersunut unammillerniarneranik ajornakusoortitsilerluni, Qarsoq Høegh-Dam isumaqarpoq.
Taamaammat pisortaqarfinni inuiaqatigiillu pigisaanni sulisut nunatsinni pissutsinut piorsarsimassutsimullu ilisimasaqarnissaat, kalaallisullu oqalussinnaasunik atorfinititsisinnaanermut piumasaqaateqarnissap inatsisinngortinneqarnissaa Siumut Nuummit siunnersuutigineqarpoq.
- Kisianni tamanna inuiaqatigiinnut ilaatitsinnginnermik isumaqanngilaq. Tamanna innuttaaqataalersitsinermut inatsiseqarnermik takussutissiiginnassaaq soorlu Danmarkimi inatsiseqartoq. Taamaammat Kalaallit Nunaanni atorfeqalissagaanni kalaallisut oqalussinnaasariaqarpoq.
Kalaallisut oqaatsivut nunatsinni salliutinneqassapput
Taakkuli tamarmik Siumup anguniagaanut akerleriissinnaapput, ilaatigummi anguniagaanni allasimavoq ”Pilersikkumallugit Nunatsinni inuiaqatigiit naligiissitaasut sumi inunngorsimaneq, suiaassuseq upperisarluunniit apeqqutaatinnagit.”
Taakku akerleriissinnaaneranik Qarsoq Høegh-Dam aperigaanni, taassuma ajornartorsiutaasorinngilaa. Immikkoortortaqarfiup siunnersuutaa partiimi anguniagaanut sanilliullugu akerleriittoqanngilaq:
- Siumut Kalaallit najoqqutaralugit pilersinneqarpoq. Partiip anguniagai atuarukkit allaqqasut siulliit ilagivaa, kalaallit oqaasii nunami salliutinneqassasut. Inatsit oqarpoq, kalaallisut oqaatsit pisortatigoortuussasut.
Siulittaasoq: Allamiunut akeqqersimaartunngussanngilagut
Isummersorneq taanna siulittaasumit Erik Jensenimit isumaqatigineqarpoq. Taassuma isummernera naapertorlugu, ataatsimeersuarnermi partiimi aallartitat akornanni isumaqataaffigineqarpoq:
- Katersortarfimmi tusaasinnaavarput, kalaallisut oqaatsit salliutinneqarnissaanik kissaateqarneq annertusoq. Taanna malillugu uppernarsarsinnaavara kalaallit pisortap suliffeqarfiinut qinnuteqartut, aqutsisutullu atorfinnut atorfinititsinerit sallinngortinneqassasut, Erik Jensen oqarpoq.
Erseqqissaatigaali politikkikkut isummernerup avammut saqqummiunnerani mianersortoqassasoq:
- Kisiannili allamiunik ajattuilluta pileraluarutta aamma taanna atorfinnut assigiinngitsunut inuttalersuisinnaanissarput aamma taanna eqqarsaatigilluartariaqarparput ilumut inuiaqatigiinnut kalaallinut iluaqutaanersoq, taama oqarpoq, nangillunilu:
- Allamiuluarneq pinnagu kisiannili piumasaqaatit kalaallinillu atorfinititsisarnermut tunngassuteqartut taakkua isumaqarpunga pimoorullugit suliassaasut aammalu taanna ataatsimeersuarnermi oqariartuutigineqartoq taamatut paasivara.
