Siumup Qasigiannguani nuna tamakkerlugu ataatsimeersuarnerani pissannganartoqarluinnarpoq.

Siumumi ullumi qinersisoqassaaq. Siulersuisuunermimmi qinersisoqassaaq, siulittaasussamillu qinersisoqassalluni.

Qinersineq nalunaaqutaq marlunut aallartittussaagaluarpoq, kinguaattoorporli. Ataatsimiinnermimi peqataasut 50-init amerlanerulaartut Erik Jensen Siumumi siulittaasuuginnassanersoq imaluunniit taanna Kim Kielsenimit Aki-Matilda Høegh-Damimiilluunniit taarserneqassanersoq taasinnginneranni pingaarutilimmik oqallisiginnittoqaqqaassaaq.

Namminiilivinnissarmi pillugu apeqqut siulittaasunngorniartut akornanni assigiinngissutaavoq.

Namminiilivinnissaq - qaqugu?

Aki-Matilda Høegh-Damip oqarnera naapertorlugu namminiilivinnissaq pillugu nunatsinni ukiut qulit tulliuttut ingerlanerani taasisoqartariaqarpoq.

Muminganilu Erik Jensenip Kim Kielsenillu nunatta Danmarkimit qaqugu avissaarnissaanut piffissaliisoqassanngitsoq isumaqarput.

Sammisarlu taanna siulittaasumut qinersinerup inernissaanut pingaaruteqarluinnalersinnaavoq. Namminiilivinnissamut apeqqut ilaasortat arlallit siulittaasunngorniartumik taasinnginnerminni akissuterseqqaarusukkaat tusarfiup KNR-imut oqaatigaa.

Piffissaanngitsukkut qinersinermik kinguneqarsinnaasoq

Siumumi immikkoortortaqarfiit arlallit avissaarnissamik ulapputeqarpallaaratik KNR-imut oqaatigereerpaat.

Erik Jensen siulittaasutut ingerlaqqittussaajunnaassaguni Inatsisartuni piffissaanngitsukkut qinersinermik kinguneqarsinnaavoq. Tamanna politikkikkut oqaaseqartartup, Sten Lundip aamma Siumumi ilaasortatoqqap Lars Emil Johansenip KNR-imut oqaatigaat.

Erik Jensenip Inuit Ataqatigiit naalakkersuisoqatigilernissaat siorna isumaqatigiissutigaa, tamannalu Erik Jensenip attatiinnarusuppaa. Taassumalu unammillertaanni tamanna allaaneruvoq.

- Tassa isumaqarpunga taakku tamarmik assigiittut, maannakkut siulittaasoq taarserneqassappat taava qinersisoqarsinnaanera periarfissatut isigineqarsinnaavoq, ilimanaateqarsinnaavoq. Pissutigalugu maannakkut naalakkersuisoqatigiinneq qanoq isummerfigissaneraat maannamut suli erseqqissumik paasinnginnatsigu, Lars Emil Johansen KNR-imut juulip 17-iani oqarpoq.

Sten Lundilu isumaqataavoq:

-  Aki-Matildamut tunngatillugu namminersulernissamut oqariartuutai taakkua IA-p politikkianinngaanniit iiuminaattutut isigineqarsinnaapput allallu oqariartuutigisarsimasai naalakkersuisoqatigiinnermut atatitsiinnarnissamut qularnartuusinnaapput.

Siumut nunatsinni partiini ukiorpassuarni annerpaanikuuvoq. Partii Naalakkersuisuni 1979-imiilli qitiusimavoq.

Siumut taamaatinngingajaavittumik siulittaasuusarpoq – piffissanilu marluinnarni Inuit Ataqatigiit siulittaasup allaffianniillutik. Siullermik 2009-mit 2013-imut. Aappassaanik Múte B. Egede 2021-mi marsimili siulittaasuulerluni.