Suliffissaaleqineq arlalitsigut akiorniarpaat
Suliffissaaleqineq arlalitsigut akiorniarpaat. Ilinniartoqarnissamik inatsisitigut pisussaaffiliineq aammalu tikisitanik sulisoqarnissamut malittarisassat sukaterneqarnissaat ilaatigut aqqutigalugit.
Nunaqavissut amerlanerit suliffissaqartinnissaat pillugu Inatsisartut oqallisigisassaasa taakku ilagaat. Amerlaqaallu suliffissarsinissamut utaqqisut. Naatsorsueqqissaartarfiup kisitsisaatai naapertorlugit februaarimi nuna tamakkerlugu suliffissaaleqisut 3.258-upput.
Inuit Ataqatigiit akuersaaruminatippaat suli tikisitanik sulilersoqartarmat pingaartumik neriniartarfinni, sanaartornermi aamma eqqiaasut akornanni naak suliffissaaleqisut amerliartoraluartut. Taamaammat IAp siunnersuutigaa tikisitsinissamut akuerineqarnissamut akinissamut piffissarititaasup ullunik 14-iniit qaammammut sivitsorneqartarnissaa.
Taassuma saniatigut IA-kkut siunnersuutigaat illoqarfikkaartumik suliffissaqartitsiniarnermut ataatsimititalianik pilersitsisoqassasoq tikisitsinissamik qinnuteqaatinik misissuataarisartussanik. Siunnersuutigineqarpoq SIK aamma sulisitsisut ataatsimiititaliani ilaasortaatitaqassasut.
- Tamanna sumiiffikkaartumik sulisoqarnikkut soqutigisaqaqatigiiffiit qanimut peqataalersinneqarusunnerannik aammalu inatsit siunertamisut atortinneqarnersoq pillugu nakkutiginninnerup sukatertariaqarneranik tunngaveqarpoq, IAp Inatsisartuni gruppia siunnersuumminik tunngavilersuivoq.
Siumumeersup Per Berthelsenip suliffissaaleqinerujussuaq aamma akueriinnarsinnaajunnaarpaa nunaqavissunut tuttarmat. Tassami sanaartornerup iluani avataaneersunik tikisitsisoqartarpoq illoqarfiit ilaanni ilinniarsimasunik sanaartortut amigaateqarmata. Ilinnialerusukkaluartullu unittarput sungiusaammik suliffissaqannginneq pissutigalugu.
Taamaammat Per Berthelsen siunnersuuteqarpoq sanaartornermi suliffeqarfiit inatsisitigut pisussaaffilerneqassasut ikinnerpaamik sisamanik ilinniartunik tigusisassasut sanaartukkap akiata 12 millioner koruunit qaangeraangagit ilinniartullu tallimat tiguneqartassasut sanaartukkat 15 millioner koruunit sinnerlugit akeqaraangata.
Per Berthelsen aamma apeqquteqaat tunngavigalugu oqaluuserisassanngortitsivoq qanoq ililluni kalaallit ilinniarluarsimasut nunatsinnut angerlarusulersinneqarsinnaanersut oqallisigitikkusullugu.
Taanna isumaqarpoq qaffasinerusumik ilinniagallit arlallit eqqorneqartut Namminersorlutik Oqartussani atorfiit inissamik innersuussiffiusut inuttalerneqaqqikkallartussaajunnarmata. Inuusuttummigooq angerlarallarnavianngillat inissamik innersuunneqanngikkunik.
Siumut isumaqarpoq misissuiffigineqartariaqartoq sooq kalaallit ilinniarluarsimasut Danmarkimi najugaqalersarnersut.
