Suliffimmut atatillugu ineqartitsineq assigiinngitsunik isummersorfigaat
Suliffimmut atatillugu ukiuni pingasuni inigititaasoq najoreersimatillugu nalinginnaasumik attartukkatut najugarisinnaalernissaanut allannguiniarneq kattuffinnit illersorneqarlunilu akerliuffigineqarpoq.
- Siunnersuut tapersersorneqarpat ilaasortagut ukiorparujussuarni aatsaat utaqqeqqaarlutik initaarsinnaasalissapput, Jess G. Berthelsen, Sulinermik inuussutissarsiutillit kattuffianni SIK-mi siulittaasoq KNR-mut oqarpoq.
Illuatungaanilli Atorfillit kattuffiat AK siunnersuummut tapersersuivoq.
- Allatut ajornartumik ilasortatta ilaat suliffimmut atatillugu inigisaminniit aniinnartariaqartarput, ukiut arfineq marluk qaangiutsinnagit allamik suliffittaarsimatillutik. Taamaattumik siunnersuummi allannguiniarneq tunngavigalugu tapersersuivugut, Erik Hammeken, AK-p siulittaasua KNR-mut oqarpoq.
Inatsisartuni ilaasortap Andreas Uldumip, D, suliffimmut atatillugu inigisap ukiuni 7-ni najugarereerlugu nalinginnaasutut attartukkatut pineqartarnera allanngortikkusullugu, ukiuni 3-ni najugarereerlugu nalinginnaasumik attartukkatut pineqartartussanngorlugu siunnersuutaa Inatsisartuni ullumi oqaluuserineqassaaq.
- Inuppassuaqarpoq suliffigisartik nuannarinngikkaluarlugu suliffimminnut atatillugu ineqartitaanertik pissutigiinnarlugu ineqartartunik. Tassaavorlu suliffimmut atatillugu ineqartitaasarnerup ajoqutaa, Andreas Uldum siunnersuummini ilaatigut taama tunngavilersuivoq.
AK-llu siulittaasuata siunnersuummi tunngavilersuutigineqartoq ilasarilluinnarpaa, kattuffik ilaasortamut suliffimmut atatillugu ukiuni arfineq marlunni suli najugarsimanngitsumut ikiuisariaqarsimammat.
- Ilaasortatta ilaata immikkut ittumik akuerineqarnermigut inigisani najuinnalerpaa, nalinginnaasumik attartukkatut pigilerlugu, Erik Hammeken siunnersuummut tapersersuinerminnut tunngavilersuivoq.
Siunnersuut Demokraatit saqqummiuppaat siunissami inigisat nammineq pigineqartalernissaannut alloriarnertut isigalugu.
- Demokraatinit qangalili kissaatigiuarparput inuit amerlasuut namminneerlutik ineqarnissartik isumagisalertassagaat. Taamaattumik paartitsinniit siuttuuffigiuarparput inissaqartitsiniarneq namminersortumik ingerlataassasoq, Andreas Uldum tunngavilersuivoq.
Erseqqissarpaalu innuttaasut, ingammik Nuummi najugaqartut – suliffeqarfiit sulisuinik taarseraaffioqisumi, suliffimminnut atatillugu ineqartitaasut inigisatik nalinginnaasumik attartukkatut piaartumik inigisalertariaqaraat, suliffiinut pituttuinersuaq atorunnaarniassammat.
Andreas Uldumip tunngavilersuutaa SIK-p siulittaasuanit ilalerneqanngilluinnarpoq.
- Tamanna inuit suliffimminnut atatillugu ineqareertut salliutinneqarnissaannik kinguneqassaaq, ilaasortagut amerlasuut ilinnigaqartuunnginnertik pissutigalugu suliffimmut atatillugu initaarsinnaasannginnamik, Jess G. Berthelsen erseqqissaavoq.