Suliffimmit ajunngitsorsiat ukiortaamit atorunnaassasut
Suliffinnit biileqartinneqaruit imaluunniit sulereernivit kingorna suliffiup akiliisarnera pissutigalugu akeqanngitsumik biilersinnaaguit taava jaanuarip aallaqqaataanit akiliisalissaatit.
Inatsit atuutilerpat ajunngitsorsiatit B-tut isertitatut, 5000 krouunimik ilanngaateqartarfiusumut nalunaarsortarunnaassavatit.
Akeqanngitsumik biileqartitaaneq, akiliunneqarluni angalanerit, akeqanngitsumik oqarasuaateqarneq, internetseqarneq, nerisaqarneq, inisimatinneqarneq aammalu akeqanngitsumik ineqartitaaneq assigisaallu sulisitsisumiit atorfeqartitanut atugassiissutigineqartut akileraarusersorneqarnerat ukiortaamiit allanngortinneqassapput.
Akeqanngitsumik ajunngitsorsiat immikkut ittumik akileraarusersorneqalissapput. Tassa akeqanngitsumik ajunngitsorsiat isertitatut B-niit isertitatut A-ngorlugit allanngortinneqassapput, taamaalillutit tamakkiisumik akileraartalissallugit.
AAMMA ATUARUK Atassutip ajunngitsorsianut akileraarnissaq itigartitsissutigaa: Utoqqatsissuteqareerpunga
Ajunngitsorsialli nammineerluni nalunaarsuiffimmi nalunaarsorneqarnissaat suli nammineq isumagisussaavat.
Akeqanngitsumik ajunngitsorsiat akileraaruserneqartarnerisa allanngortinneqarnissaa inatsisartuni siorna decembarimi akuersissutigineqarpoq.
Akissarsiaqqortunerit akeqanngitsumik ajunngitsorsiaqarnerusartut, naalakkersuisut inatsisissatut siunnersuutip saqqummiunneqarnerani oqaatigaat, inuiaqatigiinni aningaasaqarnikkut naligiinnerusoqarnissaa inatsimmi siunertaasoq oqaatigalugu.
Nunatta karsiata taassuma saniatigut 2023-mi minnerpaamik 10 millionit koruuninik isertitaqarnerunissaa aamma naatsorsuutigineqarpoq.