Suliffillit soraarnerussutisiassanut pinngitsaaliissummik katersilissapput

Nunarput aningaasarsiorluaraluartoq aningaasartuutit isertitaninngaanniit akilerneqarsinnaaginnassappata aaqqissuusseqqinnerit pisariaqarput.

Oqariartuutitoqaalersoq taanna aningaasaqarnermut naalakkersuisup Randi Vestergaard Evalsenip 2017-imut aningaasanut inatsisissatut siunnersuummik saqqummiinermini uteqqippaa.

Ukiut tallimat matuma siorna kingullermik sinneqartooruteqartussamik aningaasanut inatsisiliortoqareersoq, aappaagumut aningaasanut inatsisissatut siunnersuut sinneqartooruteqarfiusussatut missingersorneqarpoq.

Randi Vestergaard Evaldsenili sinneqartooruteqarfiusussamik missingersuusiani tusagassiortunik saqqummiuteriarlugu, Nunatta aningaasaqarnikkut aaqqissuussaanerani ajornartorsiutai nassuialerpai.

Aamma atuaruk Aningaasanut inatsisissaq sinneqartooruteqartoq

Innuttaasut akornanni Nunatta karsianik immeeqataallutik sulisut ikiliartorneri sulisunillu pilersorneqartut amerliartorneri ilaatigut ajornartorsiutaavoq. Naalakkersuisut ajornartorsiuummut iluarsiiniarlutik soraarnerussutisiassanut pinngitsoorani akilersuisalernissaq Inatsisartut ukiakkut ataatsimiinneranni siunnersuutiginiarpaat.

- Imminnut pilersortut maannatut isikkoqartillugu ikippallaarput. Utoqqanngortussallu imminnut pilersorsinnaanerusunngornissaat anguniarlugu ima aaqqissuusseqqinniarpugut, Randi Vestergaard Evaldsen oqarpoq.

Inatsit 2024-imi atuutilissappat, innuttaasut akissarsiamik 10 procentii soraarnerusisiassanut pinngitsooratik toqqortussavaat.

Aamma atuaruk Aaqqissuusseqqinnerup ileqqaagaqarnissaq pilerinarsisissavaa

Aamma inuusuttut 16-init 25-nut ukiullit ilinniagaqaratillu suliffeqanngitsut amerliartorneri ajornartorsiutaasoq, Randi Vestergaard Evaldsenip erseqqissaatigaa.

Taakku inuusuttunik immikkut sammineqartunik taaneqartarput, 2014-imilu ukioqatiminni 35 procentiullutik.

Ajornartorsiullu taanna aaqqiiniarneqassasoq, Randi Vestergaard Evaldsenip neriorsuutigaa.

- Ajornartorsiut taanna pillugu aningaasanut inatsisikkut iliuuseqarpugut. Inuusuttut immikkut sammineqartut pillugit ajornartorsiummut ilinniartitaanermut naalakkersuisoq sammisap iluani aaqqissuusseqqinnissamut suliaqarpoq, aamma inuussutissarsiornermut naalakkersuisoq assigiinngitsunik suliniuteqarluni, Randi Vestergaard Evaldsen oqarpoq.

Aamma atuaruk Randi: Innuttaasunut ikiorsiissutit ikilineqassapput