Suliatigut piginnaasat pingaarnerussapput
Qaasuitsup Kommuniani Siumup gruppiata siulittaasua Karl Kristian Kruse Siumup gruppiani ilaasortamit illuatungilerneqarpoq. Karl Kristian Kruse isumaqarpoq kommunaldirektøritaassaaq kalaaliusariaqartoq. Tamannali kommunimi atorfilittat qullersaannik atorfinitsitsiniarnermut tunngavilersuutigissallugu naammanngilaq, Palle Jeremiassen Siumut gruppianeersoq oqarpoq.
- Inuit tamatsinnut pisariaqartippugut tamatta, taamaattumik inuup qallunaajungaluaruni imaluunniit allamiungaaluaruni kalaaliunguniluunnit nunatsinnut iluaqusiisinnaanera tunniussinnaasaalu nalilersuinermi pingaarnertut atortariaqarput, Palle Jeremiassen oqarpoq.
Maanna kommunaldirektøriusup Henrik Rafnip ukiunut aalajangersimasunut atorfeqartitaanera naangajalerpoq taartissaalu marsip aallaqqaataani atorfinittussaalluni.
- Kalaaliuneq kalaalinngorsaanerlu pingaartipparput tamannali kisiat nalilersuutitut atussalugu ullutsinnut tulluutinngilaq. Neriuppunga kalaaliussusermut qallunaajussusermullu saatinneqarani pinginnaasat ilinniarsimasallu tunngavigalugit oqallinneq atorfinitsiniarnerlu ingerlanneqarumaartoq, Palle Jeremiassen oqarpoq.
