Suliat angisoorsuit pillugit inatsisissaq allanngortinniarpaat
Kisianni suut allannguutitut siunnersuuteqarfiussanersut, isumaliutissiisuummik qaqugu tunniussissanerlutik isumaliutissiissulluunniit isumaqatigiissutaasoq tunniutissanerlugu ataatsimiititaliap maannakkut oqaaseqarfigiumanngilaa.
Suliat angisoorsuit pillugit inatsisissatut siunnersuummik aamma aatsitassat pillugit inatsimmi allannguutissatut siunnersuummik inuussutissarsiornermut ataatsimiititaliap suliaqarnerminik nassuiaanerminut atatillugu taama nalunaarpoq.
Tassalu ataatsimiititaliaq allappoq, inatsisissatut siunnersuutit taakkualu immikkuualuttortaasa oqaluuserineri sukumiisimaqisut. Kattuffiit immikkullu suliallit sulinerminni akuutittarsimavaat, Naalakkersuisunullu arlalinnik apeqquteqartarsimallutik, taakkuninnga akineqareersunik.
Ataatsimiititaliaq allappoq, inatsisissatut siunnersuutit paragrafii ataasiakkaat pillugit, taakkunatigut siunertanik, ajornartorsiutillu siunnersuutinut attuumassuteqartut pillugit maanna ilisimasaqarlualerlutik, aammalu siunnersuutinut isornartorsiutaasunut tamakkiisumik isiginnissinnaalersimallutik.
Ilisimasallu tamakkua maanna suliarineqalertut, Naaja Nathanielsen allappoq.
Suliat angisoorsuit pillugit inatsimmik aamma aatsitassat pillugit inatsimmik suliaqarnermi piffissaqarluarnerunissaq pissutigerpiarlugu ukiakkut ataatsimiinneq sulineq ullunik marlunnik sivitsussasoq, ippassaq unnukkut nalunaarutigineqarpoq.
