Suliassat angisuut silap pissusaa pillugu ataatsimeersuarnermi tikissavaat
![](/sites/default/files/styles/image_934x467/public/article_images/doha_0.jpg?itok=P9IMaF6N)
Nunat assigiinngitsut CO2-mik aniatitsinerisa annikillisarneqarnissaat Nunatta Danmark peqatigalugu ataatsimeersuarnermi oqariartuutiginiarpaa, suliniutilli angisuut Nunatsinni piviusunngorsinnaasut isumaqatigiissutigineqartussani peqataatinneqannginnissaat, Nunatta illuatungaani aamma isumannaarniarsarisussaavaa.
Ineqarnermut, Attaveqarnermut Angallannermullu naalakkersuisoq Jens B. Frederiksen, silap pissusaanut tunngasunut ataatsimiigiaqataavoq, Nunarput sinnerlugu Qatarip illoqarfiisa pingaarnersaanni Dohamiippoq, Danmarkillu silap pissusaa pillugu ministeria Martin Lidegaard peqatigalugu saqqummiussissalluni. Nunatta immikkut inissisimanissaa saqqummiussinerni ilaatigut anguniagaavoq.
- Nunat annertuumik mingutsitsiffiusut inuussutissarsiutinik qangarsuarli aallutaqarput, mingutsitseqalutik. Taamaammat mingutsitsinerat annikillinissaat kissaatigineqarpoq, tamanna teknikikkut periarfissatut isigineqarpoq, Jens B. Frederiksen taama oqarpoq, nunattalu inuussutissarsiutitigut annertuunik ingerlatsiffiunngimmat, assersuutigalugu aatsitassanut tunngasunut allanillu ingerlatsiffiunngimmat, inuussutissarsiutitigut ineriartortitsiffiusinnaanissarput periarfissaasariaqartoq oqaatigalugu.
Imaanngitsorli qanorsuaq mingutsitsiinnarsinnaassasugut, Jens B. Frederiksen oqarpoq.
- Nunatsinni malittarisassaqarpugut assigiinngitsunik, inatsiseqarluta. Akuersissummillu tunisigaangatta suliffeqarfinnut assigiinngitsunut piumasaqaatit Nunatsinni annertusariaqarput, taamaalinikkut mingutsitsinerup sapinngisamik appasinnerpaaffimminiitinneqarnissaa, CO2-mik aniatitsinerup sapinngisamik appasinnerpaaffimminiitinneqarnissaa, taamaalinikkut aaqqinneqarsinnaalluni, Jens B. Frederiksen oqarpoq.
Nunat allat CO2-mik aniatitsinerat annikillisarneqartussaanerata oqallisigineqaleruttornerata nalaani uagut CO2-mik aniatitsinitta annertunerusinnaanissaa piviusorsiornerua? Jens B. Frederiksen aperaarput.
- Danmark uagut sinnerluta taama piumasaqartussaavoq, taannalu qularnanngitsumik akuerineqassaaq, kisianni eqqaamaneqassaaq nunat tamalaat akornanni isumaqatigiissusiortoqarsinnaappat, taava uagut Danmark aqqutigalugu avataaniinnissarput kissaatigisinnaavarput, Naalakkersuisoq oqarpoq.
Kissaallu tamanna Danmarkimi Folketingip nunatsinnilu inatsisartut kingusinnerusukkut isummerfigisussaassavaat. Tamannali aporfittaqarsinnaasutut, naalakkersuisup isiginngilaa.
Danmarkip silap pissusaanut ministeria Martin Lidegaard Dohami ataatsimeersuarnermi ippassaq ullaap tungaani oqalugiarpoq, Nunatsinnilu nukissiornerup 70 procentiata erngup nukinganeersuunera ilaatigut saqqummiullugu.