Siumut: Suliassaqarfiit tigumminngisagut nuutsinnissaannut aningaasat naak?

Aningaasanut inatsisissatut siunnersuutip Inatsisartunit siullermeerneqarneranut atatillugu Siumup aningaasaqarnermut ataatsimiititaliami ilaasortaatitaa Jens Immanuelsen partiini sinnerlugu oqaaseqarpoq. Suliassaqarfiit Nunatsinnut tunngassuteqartut Danmarkilli ataaniittut Nunatsinnit akisussaaffigineqalernissaanut Naalakkersuisut qanoq pilersaaruteqarnerlutik kalerriuteqarnissaat pingaartillugu Jens Immanuelsenip oqaaseqarnermini oqaatigaa.

- Tamatumunnga pilersaarusiorluni suliaqartoqarnersoq aammalu akisussaaffiit sorliit siulliullugit tigunissaat sulissutigineqarnersoq paasissallugu Siumumiit pingaartipparput. Ukiut aningaasanut missingersuuteqarfiusut eqqarsaatigalugit sillimaffigineqartariaqarsorigatsigit, Immanuelsen oqarpoq.

Saarullinniartoqarneruli

Aamma kujataani umiatsiaaqqanit aalisartut ikiorsiisarnermut aaqqiinikkut umiatsiaaqqanik nutaanik pisinissaminnut periarfissaqarluarnerunissaat Immanuelsenip ujartorpaa. Tamatumalu saniatigut saarullinnut pisassiissutit aalajangerneqarnissaannut atatillugu Pinngortitalerifiup aningaasanik amerlanernik tunineqarnissaa imaluunniit aalisartut nalunngisaasa ilaatinneqarnerusalernissaat, Siumup kissaatigaa. 

Imanuelsenimi naapertorlugu saarulliit ikippallaartut amuneqartarput.

- Aalisakkat takkussimaarnerini sukkasuumik qisuariarsinnaanissaq pingaaruteqarpoq, Jens Immanuelsen oqarpoq.