Sulianut angisuunut inatsit Hellep taperserpaa
Aamma suliniutit annertuut pillugit inatsisissaq Namminersornermut inatsit aallaavigalugu suliaasoq naqissuserpaa, Kalaallillu Nunaata piumasarissappagu aatsitassarsiorneq pillugu Danmarkip tungaaniit suleqataalernissaq piareersimaffigineqartoq ilanngullugu oqaatigaa. Tamanna Naalakekersuisut siulittaasuat Kuupik V. Kleist sisamanngorpat oqaloqatigileruniuk qaqilissamaarlugu oqaatigaattaaq.
Qallunaammi kalaallillu aatsitassanut tunngasunut ataatsimoorussamik suleqatigiissitaliamik pilersitsisoqarnissaa Kuupik Kleistip siornatigulli kissaatigereerpaa.
- Taamatullumi kissaateqarneq Danmarkip naalakkersuisuisa tusarluarlugu peqataaffigerusuppaat, ministeriuneq ullumi taama oqaaseqarpoq.
Kina-miulli sulisartut SIK-p isumaqatigiissutaanit akissarsiakitsitaanerusut nunatsinni atugarineqalersinnaanissaannik Danmarkip naalakkersuisuisa akuersaarnerat Danmarkimi sulinermik inuutissarsiuteqartut kattuffiisa, Enhedslistenip, Dansk Folkepartiillu sakkortuumik isornartorsioreerpaat.
Helle Thorning-Schmidt-illi isornartorsiuinerit akillugit Nunatsinni namminersornermut inatsit Danmarkimi naalakkersuisunit akuerineqareersoq unnerpaa, kalaallillu namminneerlutik aatsitassarsiornerup annertuup aallarnisarneqarnissaa namminneerlutik aalajangissagaat oqaatigalugu.
Nunalli allamiunut tunngassutilinnut akisussaaffik Kalaallit Nunaata suli tigusimanngimmagu Kina-miut sulisorineqarsinnaalernissaat Folketingimi ilaasortat taasillutik aalajangertariaqassavaat, Danmarkillu tamatumunnga inatsisaata allannguutissaa Inatisinik atortitsinermut ministeriaqarfiup maanna piareersaleruttorlugu.
Nunallumi tamalaat maleruagassaasa malinneqarnissaanik akisussaaffik Nunatta kisimiilluni tigummissanngikkaa ilisimasallit arlallit juullinngitsiartoq oqaatigaat, ministeriunerullu taama isummersortut taperserlugit ima oqaaseqarpoq.
- Nunat tamalaat maleruagassaasa malinneqarnissaat uagut naalagaaffeqatigiinnerup aqqani akisussaaqataaffigisuugatsigu malinneqarnissaannut qulakkeerinneqataassaavugut, Helle Thorning Schmidt oqarpoq.
