Suleqatigiissitsisuni siulittaasoq suli paatsuungassutigineqartoq
Suleqatigiisitsisuni kina siulittaasuua?
Tamanna apeqqutaasussanngikkaluarpoq, ullunili kingullerni assortuussutaavoq.
Partiip siulittaasorisimasaa Michael Rosing 2018-imi atuuffimminit sulinngiffeqalersoq maanna siulittaasunngoqqikkusuppoq.
Michael Rosing partiip malittarisassaai naapertorlugit tunuarnikuunngilaq, siulersuisuunerilli Tillie Martinussen siulittaasumittut taperserpaat.
Partii 2018-imili ataatsimeersuarpoq.
Suleqatigiisitsisut ileqquusumik ataatsimeersuarsimatinnagit Michael Rosing siulittaasutut tunuavissimanersoq taassuma Tillie Martinussenillu assoortuussutigaat.
Partiimmi siulersuisuunerisa malittarisassaai malillugit ima pisoqarpat ullut 30-it qaangiutsinnagit ataatsimeersuarnissamut aggersaasussaapput:
- Siulittaasoq tunuarpat, toquppat, qinigaasinnaanngitsutut nalilerneqarpat allamilluunniit pissuteqarluni siulittaasuunini attasiinnaajunnaarpagu.
Michael Rosing: Tunuarnikuunngisaannarpunga
Michael Rosingili 2018-imi siulittaasuuffimminit sulinngiffeqalermat ataatsimeersuartoqanngilaq.
Taamaammat taanna atuuffimminit tunuavissimanani unnerpoq.
- Sulinngiffeqarallara sivitsoraluttuinnarpoq, piffissallu ingerlanerani tunuavinnissara kissaatigaara. Tassa siulittaasuuninnit ataatsimeersuarnissap tungaanut sulinngiffeqarallassallunga, taavalu ataatsimeersuarnemi tunuavillunga, Michael Rosing oqarpoq.
AAMMA ATUARUK Tillie Martinussen aningaasaqarnermi tukattoqarneraasoqarmat ataatsimiigiaqqusisoq
Siulittaasuuffimminillu tunuarsimanerangaanini taamaalilluni ilumuunnginnerarlugu.
Siulittaasunngoqqinnissaminut soqutiginninnersoq KNR-imit aperigatsinni ima akivoq.
- Naamik, soqutiginninngilanga.
Partiip aningaasaqarnerani tukattoqanerarlugu taanna siulitaasunngoqqikkusunnerarpoq.
Siulittaasutullu tunuavitsigani torersaaqqaaniarnerarluni.
Siulersuisuunerit Tillie taperseraat
Taanna siulittaasunngoqqinniarluni nalunaaruteqarmat partiip siuleruisuuneri ataasinngormat ataatsimiissutigaat.
Taakku tamarmiullutik Tillie Martinussen siulittaasumittut taperserpaat, aningaasaqarnermilu tukattoqarnerarnera ilumuunnginnerarlugu.
Michael Rosingi suli siulittaasuunersoq Tillie Martinussen aperigatsinni, ima akivoq:
- Naamik. Tassa Michael nammineerluni siulittaasutut qangalili tunuarpoq, maannalu tassa siulittaasunngoqqinniarsaraluni. Taamaaliorporlu tusagassiutut aqqutigalugit nuanninngitsumik pasilliuteqareerluni.
AAMMA ATUARUK Tillie Martinussen siulittaasutut siulersuisuunerit taperseraat
- Siulersuisuunerit taassuma kissaataa akueriniarnagu aalajangerput. Naamik, siulittaasuunngilaq.
Tillie Martinussen oqarpoq, nunalu tamakkerlugu politikimit sivisuumik suleqataasimannginnerarlugu.
- Tassa aalajangiussagut attatiinnarpavut. Siulersuisuunerit partiip oqartussaanertarai, decembarimilu ataatsimeersuassaagut.