Tillie Martinussen aningaasaqarnermi tukattoqarneraasoqarmat ataatsimiigiaqqusisoq

Suleqatigiisitsisut siulersuisuuneri unnugu ataatsimiissapput. Ataatsimiinnermilu eqqartugassaq ataasiinnaavoq.

Partiip siulittaasorisimasaata Michael Rosingip partiip aningaasaqarnerani nutaarsiassaqartitsivimmut Sermitsiaq.ag-mut tukattoqarnerarpaa.

Aningaasarpassuit illersorneqarsinaanngitsumik atorneqarsimasut Michael Rosing oqarpoq "partiillu dankortia atorlugu namminermut atuisoqarsimannguatsiartoq" oqarluni.

Aningaasaat suut pineqarnersut Michael Rosingip KNR-imut itisilerumanngilaa siulersuisuunerniillu ilaasortatut tunuaqqammertumit tusarsimagini oqarluni.

- Siulittaasutut sulinngiffeqarallarnera kipitillugu siulersuisuunernut ilaasortanngussallunga aalajangerpunga. Siulersuisuunerni susoqarsimanersoq paasiniarumallugu taavalu torersaajumallunga, Michael Rosing oqarpoq, nangipporlu.

- Torersaarnerullu ataatsimeersuarnermi akuerineqarnissaa siunertaraara taamaalillunga tunuavinniassagama, taanna oqarpoq.

Politikimit tunuarusuppunga

Siulittaasunngoqqinniaannarluni taamaaliornersoq KNR-imiit aperigatsinni ima akivoq:

- Naamik. Politikimit tunuarnissara kissaatigigaluarpara. Partiimi siulittaasunngornissara siunertarinngilara torersaarusuinnarpungali.

- Aningaasaqarnermi ajortoqarunartoq paasitinneqarpunga, taamaammallu siulittaasunngoqqinnissara pitsaanerusutut isigaara, paasissutissat tamaasa piniassagakkit.

Taamatut pasilliineq Suleqatigiisitsisut siulersuisuunerannit eqqunnginnerarpaat.

- Ukiunut tamanut naatsorsuutigut kukkunersiuisuniit akuerisaapput, allaat kukkunersiuisunit marlunnit misissorneqarnikut, Tillie Martinussen siulersuisut sinnerlugit paasissutissiivoq.

Siulersuisuunerit pasilliinermut "erloqeqisut" ilanngullugu oqarpoq.

Michael Rosingilu siulittaasunngoqqiinnarsinnaanngitsoq Tillie Martinussen oqarpoq, taannami atuuffimminit tunuarniuteqarnikuuvoq.

Michael Rosing nuna tamakkerlugu politikimiikkunnaaraluarluni Kommuneqarfik Sermersuumi kommunalbestyrelsimi suli ilaasortaavoq.