Tillie Martinussen siulittaasutut siulersuisuunerit taperseraat

Michael Rosing Suleqatigiisitsisuni siulittaasunngoqqinniarlersaarmat partiip siulersuisuuneri ataasinngornerup unnukkuani ataatsimiipput. Taakku Tillie Martinussen siulittaasumittut tamakkiisumik taperserpaat.
Michael Rosing Suleqatigiisitsisuni siulittaasutut tunuarmat Tillie Martinussen siulittaasuugallalerpoq. Siulittaasussarsiorneq partiip ataatsimeersuarnerani taasissutigineqartussaagaluartoq coronavirus pissutaalluni ataatsimeersuarnissaq kinguartinneqarnikuuvoq. Assi © : KNR / Malik Brøns
Allattoq Ane-Marie Petersen, Anne Meisner Synnestvedt
oktobarip 20-at 2020 16:55

Suleqatigiisitsisut siulersuisuuneri immikkut ittumik ippassaq unnukkut ataatsimiigiaqquneqarput.

Partiip aningaasaqarnerani tukattoqartoq siulittaasuusimasoq Michael Rosing oqarpoq, taamaammallu taanna siulittaasunngoqqikkusuppoq.

Taamaaliuinnarsinnanngitsorli Suleqatigiisitsisut siulersuisuuneri avammut nalunaaruteqarput, Tillie Martinussenilu siulittaasumittut taperserlugu.

- Suleqatigiisitsisuni siulittaasoraarput Tillie Martinussen, Suleqatigiisitsisut siulersuisuunerini ilaasortaq Louis Sigurdsen oqarpoq.

AAMMA ATUARUK Tillie Martinussen aningaasaqarnermi tukattoqarneraasoqarmat ataatsimiigiaqqusisoq

Michael Rosing siulittaasunngoqqinniarluni nalunaaruteqareermat partiip kina siulittaasorineraa apeqqutaaqqilerpoq.

Taanna siorna marsip qaammataani nuna tamakkerlugu politikeriujunnaarpoq.

Suleqatigiisitsisut aningaasaqarnerani tukattoqarnerarlugu siulittaasunngoqqeriarluni torersaaniarnerarpoq - torersaareerunilu politikimit tunuarniarluni

Partiip aningaasartuutai siulersuisuunerit misissorsimavaat

Michael Rosingip pasilliutini, siulersuisuunerni ilaasortaajunnaaqqammertumik Jan Joe Seidsenimit tusarsimasani, KNR-imut ippassaq itisilerusunngilai.

Jan Joe Seidsen KNR-imit attaveqarfiginiaraluarparput iluatsinngitsumik, taannali Sermitsiaq.ag-mut oqarpoq partiip aningaasartuutaasa ilarpassui "namminermut atorneqarsimasut".

Taamaattoqanngitsoq Louis Sigurdsen oqarpoq.

- Aningaasartuutit atorsimasavut tamarmik allagaqarput, takussutissaqarput taavalu kukkunersiuisunit assigiinngitsunit marlunnit misissorneqarnikuupput akuerineqarnikuullutillu, Louis Sigurdsen oqarpoq

Tunuliaqutaasa taperseraat

Tillie Martinussen siulittaasutut siulersuisuunerit tamarmiusut taperseritsik taassuma ilanngullugu oqaatigaa.

Siulittaasuunerli pillugu Michael Rosing allatorluinnaq isumaqarpoq.

- Siulittaasuunera attappara. Siulersuisuunerit tamarmiusutut Tillie Martinussenimik tapersersuinerarneqarsinnaanngillat, uangami taakkununnga ilaasortaavunga.

Siulersuunerni ilaasortaajunnaaqqammertoq Jan Joe Seidsen KNR-imit oqaaseqartinniaraluarparput iluatsinnaguli.

Taanna partiip aningaasaatai pillugit isornartorsiuineranik itisiliitinniaraluarparput.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk