Sukkunut akitsuutit atorunnaarsinneqarput: Ima ilinnut sunniuteqassapput

Immaqa malugereersimassavat. Sukkut akii apparneqarput.

Naalakkersuisut sukkunut akitsuummik atorunnaarsitsillutik januaarip aqqaneq-aappaani nalunaarnerata kingorna akitsuut atorunnaarsinneqarpoq.

Taamaammat nioqqutissat sukkumik, glukosemik sirupimillu akoqartut akikinnerulerput. Tamanna flormelisinut, brun farininut sirupiniillu nioqqutissanut assigiinngitsunut aamma atuuppoq.

Taamalu sodavandinut nutaanut, mamakujunnut Haribonut imaluunniit saftinut atuunnani.

- Atuisunut pitsaasumik sunniuteqartussaapput soorunalimi akit akikinnerulertussaammata, Brugsenip pisiortornermut pisortaa, Randi Vestergaard Evaldsen KNR-imut oqarpoq.

KNI-mi nioqqutissat akii aamma apparneqarput, tamannalu Sulisoqarnermut attaveqaqatigiinnermi pisortap, Juliane Henningsen Heilmannip nuannaarutigaa.

- Sukkut akitsuutaata peerneqarnera pisisartut sinnerlugit taanna nuannaarutigaarput.

Namminersorlutik Oqartussanut kaammattuut

Pisiniarfissuit marluullutik nioqqutissanik akitsuusikkanik piniarsimapput, taakkulu akikillillugit tuniniartussanngorpaat, taamaalillutillu aningaasarpassuarnik annaasaqaatigissallugu. Pingaartumik KNI Nunatta avannaani nioqqutissarpassuarnik toqqortaasivimminiittuuteqarpoq.

Taamaattorli aningaasanik utertitseqqissinnaanerlutik Namminersorlutik Oqartussat attaviginiarlugit pilersaaruteqarput. Taamaammat akitsuummik atorunnaarsitsineq pisiniarfiit aningaasanik annaasaqarnerannik kinguneqassanngilaq.

KNI-p nioqqutissat akii sapaatip akunnerata kingulliup ingerlanerani appariartulerpai. Juliane Henningsen Heilmannip nunatsinni pisiniarfitik 68-it akinut aaqqiissuteqassanerarpai.

Brugsenimi nioqqutissat 57-it sukkunut akitsuuteqarunnaarput. Taakkunannga sioraasat tuninerpaasarpaat, sirupimillu nioqqutissat assigiinngitsut kaaviiaartinaanni annertunatik.

Sukkut nerisassanik nioqqutissanik ataatsimoortunik assigiinngitsunik akitsuuteqartut ilamininnguaraat, taamaattumik naalakkersuisunut kaammattuuteqarpoq:

- Akitsuusigaqarfik ataaseq peerpaat taanna atuisunut soorunalimi pitsaavoq, kisianni aamma eqqarsaatigineqartariaqarpoq akileraarutit uagut aamma pisiassanut iliorartaratsigit, taamatuttaarlu aamma atuisutta akilertarlugit. Pisiassat akikinnerulissappata aamma akileraarutitigut immaqa assiliaq tamaat qiviarneqartariaqarpoq ataasiakkaaginnarnagit.