- Nunami angisuumi isorartuumi, ullumi inuuniarneq akisoreeqaaq. Pingaartumillu nioqqutissat kalaallit amerlanerpaarpaarpaat ulluinnarni atugaanni akisunerpaaffiusumi naammattumik nammakkersuilluta isumaqarpugut, Jens Frederik Nielsen, siunnersuumminik itisiliivoq.Assi: KNR/ Anne Meisner Synnestvedt

Demokraatit akitsuutit peernissaannik siunnersuutaat itigartitaasoq

Kaffit, tiit, neqillu eqqussornerannut akitsuutit peernissaannik, sukkullu akikillinissaannik siunnersuut, Naalakkersuisut sukumiisumik misissoqqaarusuppaat.

Kaffit, tiit neqillu eqqussorneri akitsuuteqarunnaassasut, sukkullillu akikillissasut, Demokraatit siulittaasuat, Jens-Frederik Nielsen Inatsisartunut siunnersuuteqarpoq.

- Nunami angisuumi isorartuumi, ullumi inuuniarneq akisoreeqaaq. Pingaartumillu nioqqutissat kalaallit amerlanerpaarpaarpaat ulluinnarni atugaanni akisunerpaaffiusumi naammattumik nammakkersuilluta isumaqarpugut, Jens Frederik Nielsen, siunnersuumminik itisiliivoq.

Tamannali Naalakkersuisut isumassarsiatsialaasorinngilaat.

- Sioqqutsisumik misissuinani, tamatumalu sunniutissai qulaajaaffiginagit, ataatsimut isigalugu sipaaruteqarnissaq piviusunngortinneqarsinnaanngitsoq Naalakkersuisut isumaqarput, aningaasaqarnermut naalakkersuisoq, Asii Chemnitz Narup oqarpoq.

Naalakkersuisut allatut iliorusupput

Taamaattumik Naalakkersuisut akileraartarnikkut aaqqissuusseqqinnermik suliaqarnissartik ukiaq manna suliarissallugu pilersaarutigisartik innersuussutigaat, tassanilu Jens-Frederik Nielsenip siunnersuutaa qulaajarneqassasoq Inatsisartunut allanguutissatut siunnersuutigalugu.

AAMMA ATUARUK Demokraatit akitsuusersuiniarunnaartut

Tamannali Jens-Frederik Nielsenip paasisinnaanngilaa. Siunnersuummi aningaasalersuutitassai ersarereertut, naalakkersuisoqatigiillu akitsuutinik piiaanissaminnut qineqqusaarutertik piviusunngortinngikkaat, taanna isumaqarpoq.

- Misissueqqinnissamik oqariartorneq imersunnigivara. Pingaartumik qineqqusaarnermi partiit qanoq oqariartuuteqarsimanersut eqqarsaatigalugu. Taamaammat ugguaqaanga, ugguaqaanga kinguarsarneqartoq ugguarpuga Inuit Ataqatigiit qineqqusaarutitik soqutiginagit avaqqullugilli sulimmata, Jens-Frederik Nielsen oqarpoq.

Naalakkersuisoqatigiit Inatsisartuni partiivisa, Inuit Ataqatigiit Naleqqallu Naalakkersuisut allannguutissatut siunnersuutaat, tassa misissuisoqaqqaarnissaa taperserpaat.

Akikinnerulersinnaasut

Siunnersuut aningaasaqarnermut akileraartarnermullu ataatsimiititaliami maanna suliarineqassaaq, inatsisiliortunillu novembarip qulingiluaani aappassaaneerneqassaaq.

Siunnersuut allanngornagu akuerineqassagaluarpat nersussuup neqaa aserortigaq kilomut koruuninik qulinik akikinnerulersinnaassaaq, kaffit 500 grammitut oqimaassusillit koruuninik pingasunik akikinnerulersinnaassallutik.

Siunnersuutit nikisinnagit akuerineqaraluarpata nunatta karsianut millioninik 30-inik ukiumut annaasaqaataasassaaq. Tamanna aningaasanut inatsimmi ingerlatsinermut tapiissutinullu aningaasaliissutinit tamanit procentimik ataatsimik sipaarnikkut aningaasalersorneqarsinnaasoq, Jens- Frederik Nielsen isumaqarpoq. Taamaaliornikkut millionit 56-it ukiumut sipaarneqartassapput.

Taamatulli sipaaruteqarnissaq piviusunngortinneqarsinnaanngitsoq Naalakkersuisut isumaqarput.

Assersuutigalugumi Namminersorlutik Oqartussat isumaqatigiissutitigut allanut, soorlu nammilersorlutik inuussutissarsiortunut, pisussaaffeqarput.

Aamma Namminersorlutik Oqartussat qitiusumik allaffeqarfiata saniatigut ataanni sullissiviit, soorlu peqqinnissaqarfik ilinniartitaanerlu, allallu sipaarniuteqarnermi eqqorneqassasut, Naalakkersuisut tunngavilersuipput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat