Demokraatit akitsuusersuiniarunnaartut
Sukkunut, imigassanut aalakoornartulinnut, sukkulaanut puusianullu, aningaasanut 2020-mi inatsisissamut akuersisoqalermat akitsuusiisoqarnera, arlallit eqqaamassavaat.
Nuna tamakkerlugu akerliussutsimik takutitsinerit arlallit taamani pipput.
Demokraatit akitsuusinermi taamani naalakkersuisoqatigiinnut ikorfartortaallutik akuerseqataapput.
Nunatta karsianut 2020-mi akileraarutinit isaatitat
Kaffit eqqussorneqarneranut akileraarut: 1.9 millionit koruunit
Tiit eqqussorneqarneranut akileraarut: 94.768,89 koruunit
Neqit eqqussorneqarneranut akileraarut: 18.5 millionit koruunit
Tusarfik: Naalakkersuisut
Akitsuutilli ilaasa peernissaat partiip siulittaasuata Inatsisartunut aalajangiiffigisassatut maanna siunnersuutigaa.
- Maannakkulli kingumut qiviarlunga aningaasalersorneqarnera kukkusutut nalilerusuppara. Akisussaaffik aamma taanna uanga maannakkut siulittaasunngornikuusutut tigoriaannaavara, taamaammat aamma suliassat ingerlaannaq aaqqinniarnissaannut sulissuteqarlunga.
Siulittaasup neqit, kaffit tiillu eqqussornerannut akitsuutit peerusuppai. Sukkunut sukkulaanullu akitsuutit 2019 sioqqullugu atuuttunut aamma utertikkusullugit.
AAMMA ATUARUK Nioqqutissat peqqinnanngitsut akitsuusiiffigineqarnerat pisisartunut tunuarsimaartitsinngitsut
Tamannali piviusunngussappat Inatsisartunut ilaasortanit amerlanerussutilinnit akuerineqaqqaassaaq.
Siunnersuut akuerineqassappat nersussuup neqaa aserortigaq kilomut koruuninik qulinik akikinnerulersinnaassaaq, kaffit 500 grammitut oqimaassusillit koruuninik pingasunik akikinnerulersinnaassallutik.
Imigassanut aalakoornartutalinnut tupanullu akitsuut ataanassaaq
Demokraatit akitsuutit eqqunnissaannut 2019-imi akuerseqataagamik imigassanut aalakoornartulinnut, tupanut puussianullu ilaatigut akitsuuseeqataapput. Taakkuali akitsuutaat peerusunngilaat.
- Demokraatinit isumaqarpugut tupap maannakkut akia qaffasereertoq inissaminiittoq, Jens-Frederik oqarpoq.
- Inissaminiikkallarpoq tupa imigassarlu akitsuusersorneqarnerisa eqqartornerat maannakkuunngilaq, kingusinnerusukkut immaqa pisinnaavoq. Kisianni uagut Demokraatinit sulissutiginavianngilarput piffissaq qanittumi taakkkua akitsuutit attornissaat.
Neqinut, kaffinut tiinullu akitsuusersuiunnaarneq akitsuutinillu appaaneq nunatta karsianut 20.5 millionit koruuninik ukiumut annaasaqaataassaaq.
Sukkunut chokoladenullu 2019-p sioqqullugu akigititaanut apparneqassappata, ukiumut 9.7 millionit koruuninik annaasaqaataassaaq.
Taamaaliornermi 56 millionit koruunit ukiumut sipaarneqarsinnaaasut, Jens-Frederik Nielsen isumaqarpoq.