Ilisimatuut: Sananeqaatsikkut immikkuussuteqaruit sukkut peqqissaatigisinnaavatit

Sananeqaatsikkut aalajangersimasumik immikkuussuteqaruit, sukkoq peqqinnissannut iluaqutigisinnaavat.

Taamaassappat tupinnaqaaq, kisianni kalaallit inersimasut 6551-it misissorneqarnerannit paasisat tamanna takutippaat. 

Misissueqqissaarnermi paasineqarpoq, inuit sananeqaatsimikkut immikkuullarissumik, taaneqartumik sucrase-isomaltese, allaassuteqartut, sukkutornermikkut assigiinngitsutigut peqqinnerulersinnaasartut.    

Assersuutigalugu, timip oqimaassusaa, orsoqassusaa kiisalu kolesterol-imik akoqassusaa naapertorlugu, BMI-p appasissumik inissisimanera.

København-ip Universitet-iani Biologisk Institut-imi professori Anders Albrechtsen taamatut nassuiaavoq.

- Soorlu sukkutornerugaanni iluqutissartaqartarpasippoq. Sukkut fiberinut timip arrortissinnaanngisaanut assigusumik sunniuttarput, Anders Albrechtsen oqarpoq itisiliillunilu:

- Taamaammat sukkoq inalugarsuarnut ingerlasarpoq, tassani bakteriat nerisaralugit acetat timitsinnut pulasartoq pilersittarlugu. Acetat timitsinnut peqqinnartumik sunniuteqartarpoq, soorlu nappaatinut akiuussutissatsinnik pilersitsillunilu nererusunnitsinnik annikillisitsisarluni. Paasisat nutaat tupinnartortaraat, uumasut sukkkutornermikkut peqqinnerulersinnaanerat.

Ilisimatuussutsikkut misissuinerit naapertorlugit Nunatsinni najugallit 2 imaluunniit 3 procentii sananeqaatsimikkut taamatut allaassuteqarput.

- Sananeqaatsikkut taamatut allaasuteqassagaannai taava naggueqatigiit Inuit akornanneersumik ataakkut anaanakkullu siuaasaqartariaqarpoq, Anders Albrechtsen oqaluttuarpoq.

Ilisimatuut naapertorlugit tamatumunnga pissutaavoq, oqaluttuarisaanerup ingerlanerani paarnat naatitallu issittumi pissarsiarineqarsinnaanikuunnginnerat. 

- Taama ililluni timip neqimik orsumillu taamaallaat inuussuteqarsimasup sukkumik arrortitsilluni iluaquteqarsinnaanera allanngussaaq, Albrechtsen oqarpoq.

Taamaammat ilisimatuut isumaqarput, sananeqaatsikkut allannguut taanna, piffissami sukkulinnik pisariaqartitsinnginnerup nalaani pinngorsimassasoq.