Isertitaqarnerusinnaalerlutillu ineqarnermut tapiissut taamaaginnassasoq

Naalakkersuisut isumaginninnermut suliniutip, 24,5 millionit koruuninik aningaasartaqartup ilaatut qaqugukkut ineqarnermut tapiiffigineqarsinnaanermut killiliussat qaffanniarpaat.

Aningaasaqarnermut akileraartarnermullu naalakkersuisoqarfiup tallimanngornermi unnukkut tusagassiuutinut nalunaarummi allappoq.

Ukiup nikinneranit ilaqutariit ukiumut 10.000 koruuninik isertaqarnerusinnaalernissaat aammali ineqarnermut tapiissutisiaat ullumikkutut iinnarnissaa aalajangerneqarpoq.

- Ilaqutariit ukiumut 150.000 koruuninik isertitaqarunik ineqarnermullu tapiissutinik 50 procentimik pissarsisarunik taama taakku ukiumut 160.000 koruuninik isertitaqarnerulersinnaapput, assinganillu tapiissuteqarfigineqaannarlutik, naalakkersuisoqarfik itisiliivoq.

Akitsuutit atorunnaarsinneqartut

Ineqarnermut tapiissummut killiliussap qaffanneqarnerata saniatigut sukkunut akitsuutip atorunnaarsinneqarnissaa aamma aalajangerneqartoq, naalakkersuisut tusagassiuutinut nalunaarummi allapput.

Naalakkersuisut ’sukkunut akitsuutit ukiorpaalunni politikkikkut oqallisigineqarsimasut akitsuutinillu atorunnaarsitsineq innuttaasut ulluinnarni inuuniarnerannut pitsaasumik sunniuteqassasoq naatsorsuutigigaat’ tunngavilersuutigaat.

Niuertarfiilli akinik aaqqiineratigut aatsaat taamaattoqarsinnaasoq, naalakkersuisoqarfik allappoq.

Erik Jensen suliniutit taakku marluk ataatsimut pillugit allappoq:

- Taamatut aalajangiineq atugarissaarnerunissamik aamma nunatsinni kikkut tamarmik inuunerinnerunissaannik anguniakkatsinnut pingaaruteqarpoq. Taamatut suliaqarnerput suliassaqarfinnut tamanut ingerlateqqissavarput. Neriutigaara, akileraartarnermut aaqqissuussinermi aamma tamanna ingerlaqqissasoq.

Ineqarnermut tapiissummut killiliussat qaffanneqarnerat sukkunullu akitsuutip atorunnaarsinneqarnera isumaginninnermi suliniummut annertuup immikkoortuata aapparaa. Immikkoortoq siulleq juullinnginnerani naammassineqarpoq, tassanilu ilaqutariit meerartallit meeqqamut ataatsimut 1.000 koruunimik tapiissuteqarfigineqarnissaat akuerineqarluni.