Ilisimatusartoq: Sukkorneq glutenitalinnik nerisaqarnermik pissuteqarsinnaavoq

Arnat naartusut naartunermi nalaani glutenitalinnik nerisaqartut meeraat inunngornermi sukkortunngoreersimasinnaapput. Immikkut ilisimasallit Danmarkimeersut misissuinerisa tamanna takutippaa.
Assi © : Josh Lowensohn/Flickr Creative Commons
Allattoq DR
septembarip 20-at 2018 11:02
Nutserisoq Mads Lynge

Immikkut ilisimasallit Rigshospitalimeersut, Statens Seruminstitut suleqatigalugu, naartusut 67.500-t pillugit paasissutissat ilisimatuussutsikkut siusinnerusukkut misissuinermi pissarsiat atorsimavaat.

Glutenitalinnik nerisaqarneq, meeqqallu type 1 diabeteseqartut misissuinermi imminut naleqqiutsinneqarsimapput. Julie Christine Antvorskov, Rigshospitalimi Bartholin Insituttetimeersoq, misissuinermilu peqataasoq, taama oqarpoq:

- Arnat naartunermi nalaani glutenitalinnik nerisaqartut meeraat, arnat naartunermi nalaani glutenitalinnik nerisaqanngitsut meeraannut naleqqiullugit sukkortunngoreerlutik inunngortut marloriaammik amerlanerusut, misissuinivut takutippaat, Antvorskov DR-imut oqarpoq.

AAMMA ATUARUK Genip immikkuullarissup kalaallit sukkulersittarpai

Arnat naartusut nerisaat tamanna pillugu allanngortinneqartariaqanngitsut, taassuma erseqqissaatigaa, sukumiinerusumimmi misissuisoqartariaqartoq oqaatigaa.

Misissuinerli pissanganartuusoq, Diabetesforeningenip pisortaa Kristian Johnsen oqarpoq.

- Sooq Type-1 diabeteseqalersartoqarnersoq suli ilisimaneqanngilaq, misissuinerillu nutaat pisariaqartinneqarput, nappaatip aallaavia sukumiinerusumik paasiniarneqarniassammat, Kristian Johnsen oqarpoq.

Arnat naartusut 67.500-t akornanni meeqqat sukkortunngoreerlutik inunngortut 247-t nalunaarsorneqarsimapput.

AAMMA ATUARUK Kalaallit sukkornermik diabetes 2-mik eqqorneqakulanerusut

 

Aamma atuaruk