Suiaqatiminoortut pisortani katissinnaalernissaat Savalimmiuni itigarteqqikkaat

Suiaqatinoortut katissinnaalernissaannik siunnersuut Lagtingimi aappassaanerlugu ippassaq suliarineqarpoq.

Siunnersuut ataatsimiititaliami suliareqqitassanngorlugu Lagtingimi ilaasortaasunit 33-usunit 26-nit akuersissutigineqarpoq. 

Taamalilluni siunnersuut Lagtingimi aappassaaneerneqannginnerani ataatsimiititaliami suliareqqinneqartussanngorpoq. Suliarineqarneralu sivisusinnaavoq, siunnersuutip ataatsimiititaliami qanoq sivisutigisumik suliarineqarnissaa piffissalerneqarsimanngimmat.

Aamma atuaruk  AKUERINEQARPOQ Suiaqatiminoortut oqaluffimmi katissinnaalerput meeqqallu annersarneqaqqusaajunnaarput

Siunnersuuteqarnermi suiaqatinoortut katissinnaalernissaat inatsisitigut pisinnaanngortussaagaluarpoq. 2014-imi aamma taama siunnersuuteqartoqarpoq, taamanili aamma itigartitsissutigineqarluni.  

- Matumani apeqqut savalimmiormiut avissaartuussutigaat. Savalimmiunili suiaqatinoortut pisinnaatitaaffiinik ilungersuuteqartumik LGBT-mik suliniaqatigiiffeqalernerata kingorna apeqqut tamanna qaqileqqinneqarsinnaasimavoq, Savalimmiuni Ilisimatusarfimmi inuiaqatigiit pillugit ilisimatusarnermut lektori Gestur Hovgaard taama oqarpoq.

Aamma atuaruk  LGBT: Oqaluffimmi katissinnaalernerput nuannaarutigaarput

Siunnersuutip Lagtingimi ippassaq oqaluuserineqarnerani upperisamut tunngasut politikerit akornanni suli nalornissutigineqarput.

- Siunnersuutip oqaluffimmi katissinnaalernissamut aqqutissiuisinnaanissaa annilaangassutigaat. Siunnersuulli taama siunertaqanngilaq, akerliusulli annilaangassutigaat suiaqatinoortut taamaalillutik oqaluffimmi aamma katissinnaalissasut, Gestur Hovgaard Ritzauimut taama oqarpoq.