AKUERINEQARPOQ Suiaqatiminoortut oqaluffimmi katissinnaalerput meeqqallu annersarneqaqqusaajunnaarput
108-t akuersinerisigut akerliusoqaranilu Folketingemi Kalaallit Nunaani ilaqutariinnut eqqartuussiveqarnermut tunngasut inatsisit ataatsimoortut ullumi akuersissutigineqarput.
Inatsisit ataatsimoortut "L35" ilaatigut suiaqatiminoortartut apriilip aallaqqaataaniit oqaluffimmi katissinnaalernerannik, meeqqamullu angajoqqaatut akisussaaqatigiissinnaanerannik imaqarpoq.
Ullumi politikerit akuersinerat aamma isumaqarpoq meeqqat siunissami ukkatarineqarnerulissasut, soorlu angajoqqaatut akisussaasuuneq pillugu inatsisip allanngortinnerasigut, taamaasilluni "naveersisinnaatitaaneq" atorunnaarsinneqassalluni - tassa angajoqqaat meeqqaminnik naveersillutik annersaasinnaanerat atorunnaarsillugu.
Aamma atuaruk Meeqqat pillugit suiaqatinoortullu katissinnaanerat pillugu inatsisissat kiisami suliarineqalersut
Inatsit ukiorpanngulersuni atorneqarsimanngitsoq maannali kiisami peerneqalersoq.
Meeqqat qitiutillugit
Angajoqqaajussullu aaqqiagiinngissuteqarneranni meeqqat pisinnaatitaaffiisa qitiutinneqartalernissaat aamma siunniunneqarpoq. Angajoqqajusummi meeqqamut akisussaanniunnerannut atatillugu meeqqat aamma tusaaniarneqartalernissaat inatsisissatut siunnersuummi L35-imi ilaatinneqarpoq. Naallu angajoqqaat assersuutigalugu avissimappata meeqqap angajoqqaani najorsinnaasariaqarai allannguutissatut siunnersuummi ilaatigut atuarneqarsinnaavoq.
Inatsisissatut siunnersuutit Inatsisartuni siorna akuersissutigineqarput, Kalaallit Nunaannili ilaqutariinnut eqqartuussiveqarnermut tunngasut suli danskit akisussaaffigimmassuk, Folketingemi inatsisissatut siunnersuutit oqaluuserineqaqqaartussaasimapput. Oqaluuserinninnissarli arlaleriarluni kinguartinneqarsimavoq, ilaatigut Folketingemut aasaq qinersisoqarnissaa pillugu.
Inuit Ataqatigiinnit oqaaseqaatiti ikitsut
Kalaallit Nunaat nammineerluni Danmarki piumaffigisimavaa inatsisissatut siunnersuutit nutaat suliarissagai, taamaalillui Kalaallit Nunaanni ilaqutariinnut eqqartuussiveqarnermut tunngasut danskit tassunga tunngasunut inatsisaannut naligiisilersillugu.
Aamma atuaruk Oqaluffiit siarngi suiaqatigiinnut sianersinnaanngorput
Inuit Ataqatigiilli kisiartaalluni inatsisissatut siunnersuutini assigiinngitsunik isornartorsiuivoq. Ilaatigut angajoqqaat meeqqamut akisussaanniunneranni isumaqatigiissitsiniartoqartarnissaa - Danmarkimisut - piumasaqaataanngimmat. Angajoqqaajusullu, angajoqqaatut akisussaaqatigiittoqartillugu, meeqqap naalagaaffeqatigiiffiup iluani angajoqqaajusup aappaata akuerinngikkaluagaanilluunniit nuussisinnaanera inatsisitigut malersorneqarani aamma isornartoqartippaat.
Danskit isumaginninnermut ministeriata Karen Ellemannip isumaqatigiissitsiniartoqartarnissaanut tunngasut misissorumavai.
