Oqaluffiit siarngi suiaqatigiinnut sianersinnaanngorput

Justus Hansenillu Demokraatineersup tamanna nuannaarutigeqaa, suiaqatiminoortartummi katissinnaanissaat taassuma 2010-mi siunnersuutigaa.

- Oqaannarsinnaavunga, kiisami. Ukiuni tallimani ilungersuutigaarput. Ippassaq ulloq ullorsiorfiuvoq, danskit naalagaaffiannut una oqallisigeqqugatsigu taamani aamma ullorsiorfiuvoq, taamaalilluni nunarsuarmut siaruaattoq, Justus Hansen oqarpoq.

Justus Hansenip katittarnermut inatsisip nutarterneqarnissaa 2010-mili ukiakkut siunnersuutigaa, suiaqatigiit katissinnaanissaminnut periarfissaqarniassammata.

Inatsisartut tapersersuisut

Anguteqatigiit arnaqatigiillu aappariit katissinnaanngornissaannut inatsisartuni 27-t isumaqataapput, akerliusoqanngilarlu. Taamaalillutik allatuulli katinnikunut, nuliaasutut uiusutullu pisinnaatitaaffeqalerput.

Aamma atuaruk Justus suiaqatiminoortut pillugit inatsimmut apeqquteqarpoq

Suiaqatigiit oqaluffimmi katissinnaalernertik imminnut pingaaruteqartorujussuussaaq akuerineqartutullu misigissapput, Justus Hansen taama tikkuaavoq.

- Nunarsuaq tamakkerlugu, Nunatsinnilu tamanna akuerisassaraarput namminnermi aalajangigarinnginnamikku. Taamaammat nuannaarpunga allannguisoqarmat,Tunuminngaanniit politikeri oqarpoq, inatsillu nunaniallani oqallisaasimasoq, kiisami atuutsinneqalermat killitsippoq.

- Ataataga ippassaq sianerami oqarfigaanga tulluusimaarutigalunga, taamaammat ippassaq ulloq ullorsiornaqaaq, Justus Hansen nuannaarluni oqarpoq.

Inatsit oktobarip aallaqqaataani atuutsinneqalerpat, aappariittut nalunaarsorneqartarneq atorunnaarsinneqassaaq.