Justus suiaqatiminoortut pillugit inatsimmut apeqquteqarpoq
Ilaqutariinnermut katittarnermullu inatsisip nutarterniarneqarnerani, arnaqatiminoortartut anguteqatiminoortartullu meeravissiartaartarnerannut maleruagassat nutarterneqarpasinnginnerat Justus Hansenip tikkuarpaa.
Siullermik suiaqatiminoortartut meeravissiartaartarnermi allatulli aappariittut pisinnaatitaaffeqalernissaannut suliaq sumut killinnersoq apeqqutigaa.
Taassuma saniatigut suiaqatiminoortut Nunatsinni katittarnerannut inatsisip nutarternerani arnaqatiminoortartut allatulli arnatut ikkussivigitillutik naartulertarnerannut periarfissaat tassunga ilaanersoq apeqqutigaa.
Meeravissiartaarsinnaaneq ajornartoq
Nunatsinnilu arnaqatigiit katissimasuni aappaasutut nalunaarsorneqarsimasoq naartunngitsoq aapparisami ikkussivigitilluni qitornartaarsimasup qitornaanik meeravissiartarsinnaanera killeqarsinnaammat, tamannalu ajornartorsiutaasoq Justus Hansenip apeqqutimi tunngavilersuummi ersersippaa, angajoqqaatullu qanoq oqartussaanerat qularnaarsimanersoq paaserusullugu.
- Taamaattumik paaserusuppara taakku angajoqqaat ataatsimoorlutik qitornaminnut angajoqqaatut oqartussaanerat qularnaarneqarsimanersoq Kalaallit Nunaanni ilaqutariinnermut katittarnermullu inatsisit nutarterneqarneratigut, Justus Hansen tusagassiuutinut taama allappoq.
Suiaqatigiit katissinnaalernissaanut inatsit Inatsisartuni ullumikkut maajip 26-ani oqaluuserineqassaaq, ilaqutariinnermut katittarnermullu inatsisip nutarterneqarnissaat akuerisinnaassaneraat oqaluuserineqassaaq. Tamatuma kinguneranik suaaqatiminoortartut oqaluffimmi katissinnaanngussapput.
