LGBT: Oqaluffimmi katissinnaalernerput nuannaarutigaarput

Folketingimi inatsimmik allannguinerup kinngorna suiaaqatiminoortut nunatsinni oqaluffimmi katissinnaalerput. Tamannalu suiaaqatiminnoortartut peqatigiiffianni LGBT-Qaamanermi, peqatigiiffimmi ingerlatsisup nuannaarutigaa.

Allattoq Paarnaq Hansen

januaarip 21-at 2016 10:03

- Politikeritsinnut, oqaluffimmi ilagiinnut, inuiaqatigiitsinnillu tapersersuineq pitsaasimaqisoq ataqqinninnarpoq. Qiimmannarpoq aamma nunarput nunarsuarmioqataalluni inuiaqatigiinni naligiisitaanermut ineriartortitsilluni peqataasoq, Ivalu Rosing LGBT Qaamanermeersoq taama oqarpoq.

Taanna misigisimavoq kristumiutut oqaluffimmi katissinnaalernertik akuerinninnertut isigineqarsinnaasoq

- Eqqissisimanarpoq kuisinnikuulluta apersortinnikuullutalu massakkut inuunerup ingerlanerani tullernguuttumut periarfissaqalernerput tassuuna aamma peqataanissarput oqaluffimmi.

Aamma atuaruk VIDEO Arnaqatiminoortuulluni oqinneruvoq

Suiaaqatiminoortartut oqaluffimmi katissinnaalernerat Ivalu Rosinngip nuannaarutigaa, namminerlu katinnissani aamma eqqarsaatigisarlugu isertuutinngilaa.

- Nammineq aappaqarpunga siunissami katissamaakkannik. Massakkullu oqaluffimmi katissinnaanissarput qinersinnaangulerlugu toqqissisimanarpoq, LGBT Qaamanermi ingerlatsisoq Ivalu Rosing oqarpoq.

Suiaaqatiminoortartut apriilip aallaqqaataaniit katissinnalissapput.