VIDEO Suiaaqatiminoortut allatulli pisinnaatitaaffeqalerput

Katittussat tallimanngormat ullaakkut qulinngunngitsiartoq Hans Egedep oqaluffianut apuupput.

Tallimanngormat ulloq aappariinnut pingaarutiliuvoq. Oqaluffimmeereerunimmi inuuneq takorloorsimasartik kiisami atulertussaavaat.

- Nuliartaaliivippunga. Nuannaaqaanga tulluusimaarlungalu taama periarfissaqaratta, Henriette Simonsen oqarpoq.

Katinneq oqaluttuarisaanermut pingaaruteqarmat tusagassiorfiit tamarmik takkupput, soorunami aamma ilaquttat.

Aamma atuaruk Suiaqatiminoortut siullerpaallutik oqaluffimmi katittut

- Pilluaqaanga, misigissuseq aamma alla, Vera Mølgaard Christiansen Lailap anaanaa oqarpoq.

Palasi suiaaqatigiinnik katisitserngaarniartoq aamma pissangavoq:

- Perngaammik tamatta misililerparput. Nuannaarlutalu pissangavugut, palasi Aviaja Rohmann Pedersen oqarpoq.

Laila Henriettelu 2012-mi naapipput, 2013-milu assammiortaarlutik.

- Ukiut pingasut utaqqivugut, kiisami katippugut. Nuan,Laila Mølgaard Simonsen oqarpoq.

- Persuarsiornaqaaq, sinnattorput kiisami piviusunngorpoq, Henriette Mølgaard Simonsen oqarpoq.

Aamma atuaruk Suiaaqatigiit oqaluffimmi katissinnaatitaalerput

Ataataasoq aamma oqiliallassimaarpoq:

- Soorlu akuerisaanatik inooqatigiinnikuugamik taava ullumikkut assut pilluarnarpoq. Aamma tamatta eqqaamassagatsigu uagut tamatta kuisimasuusugut qanoq ikkaluarutta, innarluuteqaraluarutta, allamik aappaqaraluarutta tamatta asanninnermik tunisisussaavugut asaqatigiittussaallutalu, Andreas Christiansen Lailap ataataa oqarpoq.

- Kikkulluunniit imminut asaqatigiissinnaapput apeqqutaanngilaq arnaqatigiikkaluarunik imaluunniit anguteqatigiikkaluarunik apeqqutaanngilaq, asaqatigiinnerput naammappoq, Laila Mølgaard Simonsen oqarpoq.

Aamma atuaruk LGBT: Oqaluffimmi katissinnaalernerput nuannaarutigaarput

Taakkuli kisimik utaqqisimanngillat

Estrella Mølgaard Thomsen tallimanngorpamut ullormut immikkut ittumut aamma utaqqisimavoq.

- Ullumikkut ullorsiorpugut. Inuit uatsitut ittut pisinnaatitaaffii allatuulli assigiimmik, assigiimmik pisinnaatitaaffeqalerpugut. Katissinnaavugut oqaluffimmi aamma meeravissiartaarsinnaavugut.

- Kiffaanngissuseqarneq, akuerisaaneq, inuit qanoq ittuugaluarpataluunniit assigiimmik tamatta pisinnaatitaaffeqalerpugut nunatsinni ullumikkuminngaanniit, pilluarta, Estrella Mølgaard Thomsen oqarpoq.

Suiaaqatiminoortut tallimanngormat oqaluffimmi katissinnaalerput, taannaanaanngilarli, aammami meeravissiartaarsinnaanngorput.

Estrellakkut nulianilu ulloq taanna utaqqisimavaat ernertik meeravissiartaariumallugu. Ullorlu taanna Rigsombudi ammarniariartoq qinnuteqaatertik tunniuppaat.

Aamma atuaruk Suiaqatigiit palasip kajumissutsiminik katitittassavai