Aningaasanut inatsit amerlanerussuteqarluartut akueraat
Suleqatigiissitsisut, aapapagumut aningaasanut inatsisissatut siunnersuummut atatillugu isumaqatiginninniarnernut qaaqqusaasimannginnertik tupigusuutigaat.
Aningaasanut inatsisissaq ataasinngormat pingajussaaneerneqarnerani partiip inatsisartunut ilaasortaatitaata Tillie Martinussenip tamanna erseqqissaatigaa.
Isumaqatiginninniarnerit aallartisimalaarneranni qaaqqusaasimanertik Tillie Martinussenip oqaatigaa, taamanikkulli periarfissaqarsimanatik.
AAMMA ATUARUK Aningaasanut inatsisissami peqataatinneqannginnerput naapertuutinngilaq
Suleqatigiissitsisut Partii Nalerarlu aappaagumut aningaasanut inatsisissaq pillugu isumaqatiginninniarnerni mininneqarsimasut, Tillie Martinussen oqaaseqaateqarnermini oqarpoq:
- Innuttaasut arfinilerarterutaat qaangiinnarneqarsimasut takuneqarsinnaavoq. Tusarniaaffigineqarsimanissaat qulakkeerneqarsimasussaagaluarpoq, Tillie Martinussen oqarpoq.
AAMMA ATUARUK Aningaasanut inatsit amerlanerussuteqarluartut peqataaffigaat
Inunnik isumaginninnermi sullissinerup annerusumik pitsanngorsaavigineqannginnera oqaatigalugu, Suleqatigiissitsisut aappaagumut aningaasanut inatsisissamut akuersaqataajumaanngillat.
- Inuit innarluutillit atugaannik malunnaatilimmik pitsanngoriaateqanngitsoq, ajornartorsiulersinnaasunut utoqqannulluunniit pitsanngoriaateqanngitsoq. Kommunini isumaginninneq atuarfeqarnerlu kommuninut ataatsimoortumik tapiissutitigut sipaarfigineqartut, kommunillu ataatsimoortumik tapiissutisiaminnik milliliiffigineqarnerminnut piareersarnissamut periarfissaqanngitsut - maanna, kommunit ajornartorsiulersinnaasut ulluinnaasa pitsaasuunissaannik ilungersuuteqaleruttorfianni.
Aningaasanut inatsimmut tamakkiisumut 23-it akuersipput, nunatta tamakkerluni karsiata aappaagu 2019-imi aningaasartuutissaatut iseritassaatullu siunnersuummut sisamat akuersinngitsut.
