Partii Naleqqakkut aajuku najuupput. Siulittaasup partiillu sisamat, aningaasanut inatsisissaq tallimanngornermi atsiorneqarmassuk, tunanniipput. Assi: KNR

Napaattooq: Aningaasanut inatsisissami peqataatinneqannginnerput naapertuutinngilaq

Aningaasanut inatsisissap isumaqatigiissutigineqarnerani Partii Naleqqap peqataatinneqannginnini uggornartipaa.

Aningaasanut inatsisissaq 2019-mut atuuttussaq partiinit isumaqatigiissutigineqareermat Jens Napaattooq tusagassiutinut katersortitsinermi naapikkatsigu naammagisimaarinninngilaq.

AAMMA ATUARUK Aningaasanut inatsit amerlanerussuteqarluartut peqataaffigaat

Inatsisartuni partiit arfineq marluupput, taakkunannga partiit tallimat isumaqatigiissummi peqataapput.

Partii Naleraq isumaqatigiissuteqarnermi peqataanngilaq, tamannalu aningaasaqarnermut ataatsiimiititaliami ilaasortap 
Jens Napaattuup uggornartippaa:

- Soorunami uggornarpoq sukumiinerusumik peqataatinneqarsimannginnerput tassani takutinneqarmat.

Qaaqquneqarnissartik naatsorsuutigigaluaraat

Taassuma paasisinananngilaa, isumaqatigiissuteqarnermi amerlanerusut peqataatinneqassappata Partii Naleraq qaaqquneqarsimanngimmat:

-Isumaqatigiinniarnikuuvugut aamma neriorsorneqarnikuugaluarpugut aggersarneqaqqissasugut taamatullu pisoqarsimanngilaq. Kisiannilu aamma takusinnaavarput partiit tamangajammik isumaqatigiillutik Inuit Ataqatigiit ilanngullutik atsiorsimagaat isumaqatigiissut aningaasanut inatsissaq ukiumut nutaamut.

AAMMA ATUARUK Aningaasanut inatsisissaq isumaqatigiissutigineqartoq

Suleqatigiinneq qimanngilarput

Partii Naleraq aningaasanut inatsimmi isumaqatiginniarnermi peqataatinneqarnissaannut tikilluaqquneqarsimagaluartoq, aningaasaqarnermut naalakkersuisup Vittus Qujaukitsup oqaatigaa:

- Tassa Naleqqap nammineerluni taanna akisariaqassavaa tassami suleqatigiinneq uagut qimanngilarput taamaattumik matu isumaqatigiinniarnerni uagut ammatipparput.

Erseqqissaatigalugulu nassuiaatigaa Partii Naleraq sooq isumaqatiginninniarnermi peqataasimanngitsoq. Taannami naapertorlugu partiip piumasaqatai tutsuiginarsimanngillat:

- Isumaqarpunga taanna pissutsinik sangutitsinerusoq tassami isumaqatigiinniarnitsinni saqqummiussuunneqartut aningaasalersuinissamullu oqariartuutaasut piviusorsiortutut nalilerneqanngimmata ingerlariaqqinnissamut toqqammaveqarsimanngilagut taamaattumik uani taamatut oqariartuuteqarneq illuatungilerusuppara aamma taakku namminneerlutik oqariartuutaat piviusorsiortutut isigisimanngilagut.

Aningaasalersuinissamulli Partii Naleqqap siunnersuutigisimasai arlallit isumaqatigiissummi ilaatinneqartut, Napaattooq oqarpoq. 
 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat