Kangilinnguit takornariartarfittut atornissaanik pilersaarutit angisuut
Taanna Vestnorden Travel Marteqarnerani Kangilinnguit pillugit pilersaarutinik 60 millionit koruuninik nalilimmik takorluukkanik saqqummiivoq.
- Inunnit nuannarineqaqaaq. Saqqummersitsinermi takusamini pissanganarnerpaasoq, Islandimeersup ataatsip oqaatigaa, Peter Barfoed, tegnestuen Nuummeersoq oqarpoq.
AAMMA ATUARUK Kangilinnguit septembarimiit sulisoqaqqilissaaq
Pinngortitaq alianaalluinnartoq
Arktisk Kommandop Kangilinnguit 2012-imi qimappaa, ukioq mannalu septembarimi innoqqippoq.
2020-mi suli innoqqinnerujumaartoq takornariaqarluarsinnaajumaartorlu, Peter Barfoed oqarpoq.
- Pisuttuarfigiuminartorpassuaqarpoq, eqaloqarfinnik kooqarpoq Sermersuarmullu ungasigani, Nunaqarfik inuerunnikoq Ivittuut Kangilinnguit ungasinngisaaniippoq. Ivittuut 1987 tikillugu orsugiassiorfiummat oqaluttuarisaanermut pingaaruteqartuusoq, Peter Barfoed oqarpoq.
AAMMA ATUARUK Peter Barfoed: illunik pitsaalluinnartunik asuli eqqaaneruinnassaaq
Orsugiak amerikamiut sorsunnersuup kingulliup nalaani pinngitsoorsinnaangilaat, umiarsuarnik timmisartunillu sorsuutinik sanaartornerminni alumiiniu atortaramikku.
Taamaammat amerikamiut tuusintilikkuutaat tyskinut illersuisussatut Ivittuunut tikisinneqarput.
- 1942-mi tikipput, kisianni 1940-rumili septemberimi qamutilinnik Ivittuut akiani paava tungaanilu inissiipput, tyskit aqqartartuinik takkuttoqassagaluarpat eqqaateriaannanngorlugit.
Taamanili sorsuutinut umiarsualiveqalerpoq, danskit sakkutuuisa 1951-imi pigiligaannik.
Takornariat ukiumut 4000-it
Takornarnialerinissamik pilersaarusiaq pingasunngorlugu avinneqarpoq, illullu 24-t siulliit pilersaarutit malillugit 2020-mi atulissapput.
Takornarialerinermili Siunnersuisoqatigiit, Visit Greenlandip, Kangilinnguani takornariaqarluaratarsinnaanera takusinnaanngilaat.
Periarfissarli ammatippaat.
- Taqqavani periarfissaqarsorisoqarpat tapersersuiumarpugut, Visit Greenlandimi pisortaagallartoq Lykke Yakaboylu oqarpoq.
Pilersaarusiaq 60 millionit koruuninik nalilik iluaqutigalugu Kangilinnguit takornarianit ukiumut 4000-tinik tikinneqartarumaartoq naatsorsuutigineqarpoq.
Pilersaarummut aningaasaleerusuttut Peter Barfoedip attaveqarfigilereerpai.
AAMMA ATUARUK Kangilinnguit pisariaqartipparput
Iluamilli paasisaqartigatik aningaasaliisartumut ataasiinnarmulluunniit imaluunniit kangilinnguanik ingerlatsisussamik ataasiinnarmulluunniit isumaqatigiissusiorsinnaanngillat.
- Illersornissaqarfiup illunik sorlernik atuiniarnera paasissallugu utaqqiinnarparput. Taava Kommuneqarfik Sermersuumut Illersornissaqarfimmullu isumaqatiginninniarnerit aallartikkumaarpavut, Peter Barfoed taama oqarpoq.