Peter Barfoed: illunik pitsaalluinnartunik asuli eqqaaneruinnassaaq
- Iluatinnartorpassuit maangaannartinneqarnissaat aarleraara.
Illuliassanik titartaasartoq Peter Barfoed, Ivittuuni peroriartorsimasoq Kangilinnguillu ataannarnissaannik suliniuteqartoq taama oqarpoq.
Pingaartumillu Kangilinnguani sakkutooqarfiusimasumi illuutit iluatigigaluarpai.
Kangilinnguani avatangiisinik saliinerup peqatigisaanik illuutit isarterneqarnissaat danskit Illersornissaqarfiata suliariumannittussarsiuutileruttorpaa.
Peter Barfoedili isumaqarpoq suliariumannittussarsiuussineq allanngortinneqartariaqartoq. Illummi pineqartut paarilluagaasupilussuupput.
- Illunik amerikamiut nalaanneersoqanngilaq. Immaqa taamaallaat illu ataaseq illulluunniit affaa. Illut tamarmik nujaanerupput 70-ikkunni 80-ikkunnilu sanaajullutik. Taakkulu paarilluagaasupilussuupput. Immaqa Kalaallit Nunaanni paarilluagaanersaapput. Taamaammat illunik pitsaalluinnartunik asuli eqqaaneruinnassaaq.
AAMMA ATUARUK Kangilinnguani saliinissamut suliffeqarfiit tallimat neqeroortussanngortut
Illuutit avatangiisinik saliinissamik piumasaqataatitalerlugit Illersornissaqarfimmit tuniniarneqarsimagaluarput. Pisiarinissaalli soqutigineqarsimanngilaq.
Taamaammat suliffeqarfiit tallimat avatangiisinik saliinissamut illuutinillu isaterinissamut piukkunneqarlutik suliarimannittussarsiuussinermi Illersornissaqarfimmit neqerooqquneqarsimapput.
Illersornissaqarfiulli suliariumannittussarsiuussineq allanngortittariaqarpaa avatangiisit salinneqarnissaat kisiat isumagalugu illuutillu tuniniarlugit, Peter Barfoed taama isumaqarpoq.
- Sumiiffik periarfissarpassuaqarpoq atorluarneqartariaqartunik. Aamma illuutit atorluarnerisigut ineriartortitsinermik aallartisaanissaq ajornannginnerussaaq. Taamaanngippammi aallaqqaataaneertoqartariaqassaaq, tamannalu ajornarnerussalluni.
AAMMA ATUARUK Kangilinnguit siunissaat eqqartuleraat
Illersornissaqarfiup Kangilinnguani illuutai katillugit 16.000 kvadratmeterit missaannik annertussuseqarput.
Danskit illersornissamut ministeriata Peter Christensenip Folketingimi Kalaallit Nunaannut tunngasunut ataatsimiititaliamut akissuteqaataa naapertorlugu, 'isumaqatigiissusiornissamut toqqammavissaqannginneranik naliliisoqassagaluarpat suliariumannittussarsiuussineq taamaatiinnarneqarsinnaavoq', ministeri taama allappoq.
Suliffeqarfiit arlallit Kangilinnguani illuutit soqutiginartissimavaat, ilaatigut Schweitzimi aningaasaateqarfik inuusuttunut nunalerinermik ilinniarfimmik pilersitserusuttoq soqutiginnissimalluni.
