Politikki

Kangilinnguit siunissaat eqqartuleraat

Kangilinnguani sakkutooqarfiusimasup siunissaa Folketingip Kalaallit Nunaannut tunngasunut ataatsimiititaliaani ullumi oqaluuserineqassaaq.

Allattoq Helle Nørrelund Sørensen

oktobarip 23-at 2015 06:24

Nutserisoq Simon Uldum -

Issittumi Sakkutooqarfiup Kangilinnguanit Nuummut 2012-imi nuunneqarnerata kingorna Illersornissaqarfiup Kangilinnguani illuutai atorneqarsimanngillat.

Illuutit neqeroortitsinikkut tuniniarneqarsimagaluarput neqeroortoqaranili.

Taamaammat ilaatigut Aleqa Hammondip siunnersuutigisimavaa illuutit 16.000 m2-iusut isaternagit Nunatsinnut tunniutiinnarneqassasut - peqatigiiffinnut, suliniaqatigiiffinnut allanullu soqutiginnittunut atugassanngorlugit.

AAMMA ATUARUK Kangilinnguit isaterneqarnissaa Hammondip unitsikkusuppaa

Illersornissaqarfiulli, Namminersorlutik Oqartussat Kommuneqarfik Sermersuullu suleqatigiillutik Nunatsinni pisortani oqartussat illuutit pigilerusussinnaaneraat misissoraluarmassuk aamma isumaqatigiissuteqartoqanngilaq.

Taamaammat Kangilinnguani saliinissamut kaammattuuteqartussamik avatangiisit pillugit suleqatigiissitamik Namminersorlutik Oqartussat Illersornissamullu ministereqarfiup akornanni pilersitsisoqarpoq.

Kaammattuuteqarnissaatalu tungaanut Illersornissamut ministereqarfiup saliinissap isumagineqarnissaanut suliariumannittussarsiuussinissaq piareersarpaa - aasaru aallartinneqartussatut pilersaarutigalugu.

Allamilli saqqummiussisoqassappat suliarimannittussarsiuussineq taamaatiinnarneqarsinnaasoq Illersornissamut ministereqarfiup ilisimatitsissutigaa.

Kangilinnguit siunissaat eqqartuleraat

Aamma atuaruk