Kangilinnguani saliinissamut suliffeqarfiit tallimat neqeroortussanngortut
Sanaartugassanik suliassinneqartartut tallimat Kangilinnguani sakkutooqarfeqarfiusimasumi saliinissamut Danmarkip illersornissaqarfianit toqqarneqarsimasut aviisip allaaseraa, tassa saliinissamut neqerooruteqartinneqassallutik.
Sanaatugassanik suliassinneqartartut sisamat Danmarkimeersuupput, ataaserlu USA-minngaanneersuulluni.
Suliffeqarfiit pineqartut Kangilinnguaneeqqammerput, Kangilinnguit oqaluttuarisaanerat pillugu annerusumik paasisassarfiugiartorlugu, saliisoqarnissaanullu suliassat suunersup paasisassarfiugiartorsimallugu.
AAMMA ATUARUK Kangilinnguit siunissaat eqqartuleraat
Suliffeqarfiit saliinissamut decembarip aallaqqaataata tungaanut neqerooruteqarsinnaassapput. Illersornissaqarfik taava ukiortaartinnagu taava kikkut Kangilinnguani saliisoqarnissaanik suliassinneqassanersut toqqassavai, saliinerlu aappagu maajip aallaqqaataani aallartissinnaanngussalluni. Saliinerup ukiunik marlunnik pingasunilluunniit sivisutiginissaa naatsorsuutigineqarpoq.
Saliinissap qanoq akeqarnissaa ilaatigut saqitsaassutigineqarnikuuvoq, saliinissamummi missingersuutit danskit illersornissaqarfiannit aallaqqaammut appasippallaartinneqarmata.
Illersornissaqarfiup suliassamik neqerooruteqartitsiniarnermini maanna nalunaarutigaa Kangilinnguani saliinissaq 150 aamma 300 millionit koruunit akornanni akeqassangatinneqartoq.
