Stoltenberg tapersersorteqarluarpoq
Ministerit ulluni ajornartorsiorfiusuni sulinerat pillugu inuit isumaannik paasiniaanini aviisip "Verdens Gang"-ip ullumi saqqummiuppaa.
Jens Stoltenbergip sulisimanera pillugu inuit isumaannik paasiniaanermi kisitsisit imaannaanngitsut saqqummerput, inuillu piumasaat naapertorlugu Jens Stoltenberg sulisimasoq kisitsisit takutippaat. Nunap ittuatut sassartarsimavoq inuiaqatigiit akornanni qununeq ersiornerlu annikillisissimallugu.
Pissusilersorsimaneranut tapersersorteqalersimavoq, ajornartorsiorfimmi sulinera inuit 80 procentiisa tapersersorpaat, aammalu allat ajunngilluinnaqqinnaartumik sulisimanerarpaat, katillugit inuit apersorneqartut 92 procentiisa ministeriuneq piffissami ajornartorsiorfimmi tapersersorpaat. Kunngikkormiuniillu nuannarineqarluartunit nuannarineqarnerulersimavoq, kunngikkormiut innuttaasut 80 procentiisa ataatilaarlugit tapersersormatigit. Partiit naalakkersuisuutitaqartut ministeriunerlu tapersersorneqarluarput.
Norgemilu qaammatip tulliani kommunemut qinersisoqalerpat tapersersuineq tamanna Arbejderpertiet-imit malugineqarsinnaassaaq. Norgemi naalakkersuisuutitaqartut Arbejderpartiet tapersersorneqarnerat malunnassasoq ilimanarpoq.
Partiip ilarujussua, partiip inuusuttai amerlasuut Utøyami toqoraanermi toqutaapput, tamannalu siunissaq ungasinnerusoq eqqarsaatigalugu partiip politikikkut suliniarnerani ajornartorsiortitsisinnaassasoq ilimanarpoq, piffissarli qaninnerusoq eqqarsaatigalugu kommunemi qinersinermi tapersersortinik qinerneqarluassasoq ilimanarpoq.
